"میں اس وقت ایک دلدل میں پھنسا ہوں. میں بہت زیادہ نہیں سوچتا، میری چار پانچ فلمیں ناکام رہیں، جس پر مجھے بہت سارے تعزیتی پیغام ملے. جس پر میں نے کہا، ابے مرا نہیں ہوں میں۔ ایسا لگا کہ لوگ تعزیتی پیغامات بھیج رہے ہیں"
یہ کہنا ہے دہائیوں سے بالی وڈ کے ایکشن ہیرو کے طور پر پہچانے جانے والے ہیرو اکشے کمار کا جن کی گزشتہ چار سالوں میں 9 فلمیں فلاپ ہوئی ہیں.
جمعہ کو ممبئی میں اپنی آئندہ آنے والی فلم ’کھیل کھیل‘ کے ٹریلر ریلیز کے موقع پر اپنی حالیہ فلموں بڑے میاں چھوٹے میاں اور سرپھرا کی باکس آفس پر ناکامی کے بارے میں گفتگو کرتے ہوئے اکشے کا کہنا تھا کہ ایک صحافی نے لکھا فکر نہ کریں، آپ دوبارہ آئیں گے۔
میں نے اسے فون کیا اور کہا کہ تم یہ کیوں لکھ رہے ہو؟ واپس آنے سے تمہارا مطلب کیا ہے؟ میں کہاں چلا گیا ہوں؟ میں یہیں ہوں اور کام کر رہا ہوں۔ میری ساری توجہ نئے پروجیکٹس کے کام کی جانب ہے اور میں باؤنس بیک کروں گا.