اس بار بھی پیٹرولیم مصنوعات کی قیمتوں میں کمی کا امکان ظاہر کیا جارہا ہے اور
اگر ایسا ہوجاتا ہے تو یہ کمی مسلسل چوتھی بار ہوگی۔
15 ستمبر سے پیٹرولیم مصنوعات کی قیمتوں میں تقریباً 10 روپے فی لیٹر کمی متوقع ہے۔
میڈیا رپورٹ کے مطابق گزشتہ 15 دنوں کے دوران بین الاقوامی مارکیٹ میں پیٹرول اور
ہائی اسپیڈ ڈیزل کی قیمتوں میں تقریباً 5 ڈالر فی بیرل کی کمی آئی ہے۔
اس اعتبار سے موجودہ ٹیکس کی شرح کے مطابق پیٹرول اور ہائی اسپیڈ ڈیزل کی قیمتوں
میں 10 سے 11 روپے فی لیٹر کمی کا تخمینہ لگایا گیا ہے۔
یاد رہے کہ 31 اگست کو حکومت پاکستان کی جانب سے مسلسل تیسری بار پیٹرولیم مصنوعات
کی قیمتوں میں کمی کا اعلان کردیا گیا تھا۔
پیٹرول کی قیمت میں 1.86 روپے فی لیٹر کمی کی گئی تھی جبکہ ہائی اسپیڈ ڈیزل کی قیمت
میں 3.32 روپے کمی کی گئی۔
کمی کے بعد پیٹرول کی نئی قیمت 259.10 روپے فی لیٹر ہوگئی تھی جبکہ ڈیزل کی نئی
قیمت کم ہو کر 262.75 روپے فی لیٹر ہو گئی۔