پاکستان میں ہر سال 9 نومبر کو عظیم شاعر، فلسفی اور مصورِ پاکستان علامہ محمد اقبال کی یاد میں یوم اقبال منایا جاتا ہے۔ عمومی طور پر اس دن کو عام تعطیل سمجھا جاتا ہے، مگر پچھلے کچھ سالوں سے حکومت نے یومِ اقبال کی تعطیل کو منسوخ کر رکھا تھا، جس کی وجہ سے عوام میں مایوسی دیکھنے کو ملتی رہی۔
اب جیسے جیسے 9 نومبر کا دن قریب آ رہا ہے، ہر کوئی یہی جاننا چاہتا ہے کہ کیا اس بار حکومت نے یومِ اقبال پر چھٹی بحال کی ہے یا نہیں؟
ذرائع کے مطابق، وفاقی کابینہ ڈویژن کے جاری کردہ سالانہ تعطیلات کے نوٹیفکیشن میں یومِ اقبال کو عام تعطیل کے طور پر شامل کیا گیا ہے، مگر باضابطہ اعلان کا انتظار باقی ہے۔ اگر اس کا نوٹیفکیشن جاری ہوا تو سرکاری و نجی اداروں میں چھٹی ہوگی۔
یاد رہے کہ علامہ اقبال 9 نومبر 1877 کو سیالکوٹ میں پیدا ہوئے، اور ان کی شاعری اور فلسفہ نے برصغیر کے مسلمانوں کو آزادی کی راہ پر گامزن کیا۔ یومِ اقبال کے موقع پر اردو ادب سے محبت رکھنے والے اور فلسفہ اقبال کے شیدائی ہر سال تقاریب، مشاعروں، اور خصوصی تعلیمی سرگرمیوں کا انعقاد کرتے ہیں تاکہ نئی نسل کو اُن کے خیالات اور افکار سے روشناس کرایا جا سکے۔