کنبیرا: پاکستان اور آسٹریلیا کے مابین پہلا ٹی 20 میچ آج برسبین میں کھیلا جائے گا۔
پاکستان اور آسٹریلیا کے درمیان ٹی 20 میچز کی سیریز کا پہلا میچ آج پاکستانی وقت کے مطابق دوپہر ایک بجے شروع ہو گا۔ پہلے ٹی 20 میچ کے دوران بارش کا بھی امکان ہے جس کی وجہ سے میچ متاثر ہو سکتا ہے۔
میچ سے قبل قومی اسکواڈ نے گابا اسٹیڈیم میں پریکٹس کرتے ہوئے بیٹنگ، باؤلنگ اور فیلڈنگ کی مشقیں کیں۔
محمد رضوان ٹی 20 انٹرنیشنل میچ میں پاکستان ٹیم کی قیادت کرنے والے 12 ویں کپتان ہوں گے۔ محمد رضوان کا کہنا تھا کہ تیاری اچھی ہے اور فائنل الیون سے متعلق وہی فیصلہ کریں گے جو بہتر ہو گا۔
یہ بھی پڑھیں: اے سی سی نے پہلے انڈر 19ویمن ایشیا کپ کا شیڈول جاری کر دیا
اس فارمیٹ میں دونوں ٹیمیں آخری بار مارچ 2022 میں لاہور میں آمنے سامنے آئی تھیں جس میں آسٹریلیا نے کامیابی حاصل کی تھی۔
پاکستان اور آسٹریلیا کے درمیان اب تک کھیلے گئے ٹی 20 میچز میں قومی ٹیم کا پلڑا بھاری ہے۔ دونوں ٹیموں کے درمیان اب تک 25 میچز کھیلے جا چکے ہیں جس میں گرین شرٹس نے 13 اور کینگروز نے 11 میں کامیابی حاصل کی جبکہ ایک میچ بغیر نتیجہ رہا۔
یاد رہے کہ قومی ٹیم ون ڈے سیریز میں میزبان آسٹریلیا کو دو ایک سے شکست دے کر سیریز اپنے نام کر چکا ہے۔