عبدالعزیز بن عبدالرحمٰن السعود کون تھے جنھوں نے جدید سعودی عرب کی بنیاد رکھی اور اس کے پہلے بادشاہ بنے؟
شہزادہ عبدالعزیز بن عبدالرحمٰن السعود کے ہمراہ ان کا خاندان اور ان کے ہاتھ پر بیعت کرنے والوں کو ملا کر کل 60 افراد تھے جب انھوں نے پانچ جنوری 1902 کو ریاض شہر کو الراشد خاندان کے ہاتھوں سے واپس حاصل کر کے اس کے حاکم بن گئے۔ بعد ازاں ریاض کے شہریوں نے بھی ان کے ہاتھوں بیعت کر لی۔
لیکن عبدالعزیز بن عبدالرحمٰن السعود کون تھے جنھوں نے جدید سعودی عرب کی بنیاد رکھی اور اس کے پہلے بادشاہ بنے؟
عبدالعزیز السعود 1876 میں ریاض کے حاکم خاندان السعود میں پیدا ہوئے۔
تاہم ان کے خاندان کو اپنے حریف اور نجد کے حاکم الراشد خاندان کے ہاتھوں شکست ہو گئی جس کے بعد محض 10 برس کی عمر میں انھیں اپنے خاندان کے ہمراہ ریاض چھوڑنا پڑا۔
ان کے والد عبد الرحمٰن بن فیصل بن ترکی السعود دوسری سعودی ریاست کے آخری حاکم تھے جب کہ ان کی والدہ کا نام سارہ بنتِ اگمد الکبیر بن محمد بن ترکی بن سلمان السدیری تھیں۔
جدید سعودی عرب کا قیام
جنوری سنہ 1902 میں عبدالعزیز السعود کویت سے اپنے خاندان اور حامیوں پر مشتمل 60 افراد کے قافلے کے ساتھ ریاض پہنچے اور وہاں کا کنٹرول حاصل کر لیا۔
ستمبر 1904 میں انھوں نے جنگِ الشنانة میں الراشد خاندان کو شکست دے کر القصيم پر کنٹرول حاصل کر لیا۔ اس کے بعد نجد کے بیشتر حصوں پر ان کی حکمرانی قائم ہو گئی۔
سنہ 1912 میں وہابی نظریے کے تحت ’اخوان من اطاع الله‘ (خدا کی اطاعت کرنے والے بھائیوں) تحریک کی بنیاد رکھی گئی جس نے عبدالعزیز کو بڑی مدد فراہم کی۔
عبدالعزیز نے 1913 میں الاحسا کی جانب پیش قدمی کی اور سلطنت عثمانیہ سے اس کا کنٹرول حاصل کرنے میں کامیاب ہو گئے۔
سنہ 1921 میں شہزادہ فیصل بن عبدالعزیز کی قیادت میں السعود فورسز نے عسیر پر بھی قبضہ کرنے میں کامیاب ہو گئے۔
اسی سال السعود کی فوجیں الراشد خاندان کا مضبوط گڑھ سمجھے جانے والے حائل میں داخل ہونے میں کامیاب ہو گئیں اور اس کے ساتھ ہی پورے نجد پر السعود خاندان کی حاکمیت قائم ہوئی اور عبدالعزیز نے خود کو نجد کے سلطان کا لقب دیا۔
دوسری جانب حجاز کے حاکم شریف حسین کے ساتھ بھی عبدالعزیز کے تعلقات کافی کشیدہ تھے۔
سنہ 1924 میں عبدالعزیز کی فوج طائف اور مکہ میں داخل ہونے میں کامیاب ہو گئی تاہم جدہ پر قبضہ کرنے میں انھیں مزید ایک سال سے زیادہ لگ گیا اور بالآخر دسمبر 1925 ان کی فورسز وہاں بھی داخل ہو گئیں۔
1926 میں، عبد العزیز نے مکہ کی مسجد الحرام میں حجاز کے بادشاہ کی حیثیت سے حلف اٹھا لیا۔
سعودی ریاست اور انقلاب
خلیج عرب کے ساحلوں پر برطانیہ کی موجودگی اور بین الاقوامی حالات کے پس منظر میں عبدالعزیز السعود نے جدید سعودی ریاست کے قیام کی بنیاد رکھنی چاہے لیکن اس کام میں انھیں اپنے ہی اتحادیوں کی جانب سے مزاحمت کا سامنا کرنا پڑا۔ اخوان من اطاع الله نے ان کا حکم ماننے سے انکار کر دیا جس نے دونوں کے درمیان تصادم کو جنم دیا۔
اخوان کی جانب سے عراق اور کویت پر حملے کیے گئے اور انھوں نے حجاز کے الحاق کے بعد حکام کو چیلنج کر دیا۔
اخوان سادہ رسومات کو بھی بت پرستی کا مظہر سمجھتے تھے اس لیے انھوں نے السعود کی حاکمیت کو چیلنج کرنا شروع کر دیا۔
تحریک نے عبدالعزیز کے کویت اور عراق پر حملہ نہ کرنے کے حکم کو بھی ماننے سے انکار کر دیا۔
اس کے بعد مارچ 1929 میں زلفی کے مقام پر السعود کی فوجوں اور اخوان کے درمیان تصادم ہوا جس میں تحریک کو شکست ہوئی اور اس کے ارکان کویت واپس چلے گئے جہاں انھوں نے انگریز فوج کے سامنے ہتھیار ڈال دیے۔
اس کے بعد تیسری سعودی ریاست وجود میں آئی۔ اس سے قبل 1921 تک اس کا نام امارت نجد اور الاحساء تھا جب کہ 1922 تک اس کا نام سلطنت نجد تھا۔
سنہ 1926 تک یہ سعودی ریاست سلطنت نجد اور اس کے انحصار کہلائی جاتی رہی اور 1932 تک یہ سلطنت حجاز اور نجد اور اس کے انحصار کے نام سے جانی جاتی رہی جب تک سعودی عرب کی مملکت کے قیام کا اعلان نا کر دیا گیا۔
عبدالعزیز آل سعود کو کئی القابات دیئے گئے جن میں عربوں کا نپولین، بسمارک، صحرا کا کرم ویل اور نیا بادشاہ سلیمان شامل ہیں۔
