آئی سی سی چیمپئنز ٹرافی کے دوسرے سیمی فائنل میں نیوزی لینڈ کی جنوبی افریقہ کے خلاف بیٹنگ جاری ہے۔
لاہور کے قذافی سٹیڈیم میں نیوزی لینڈ نے 47 اوورز میں پانچ وکٹوں کے نقصان پر 324 رنز بنائے ہیں۔
اس سے قبل نیوزی لینڈ نے ٹاس جیت کر بیٹنگ کا فیصلہ کیا تھا۔
کیویز نے اننگز کا آغاز محتاط انداز میں کیا، اوپنرز ول ینگ اور راچن رویندرا نے ٹیم کو 48 رنز کا آغاز فراہم کیا۔
نیوزی لینڈ کو ابتدائی نقصان آٹھویں اوور کی آخری گیند پر ول ینگ کی صورت میں ہوا، وہ 21 رنز بناکر آؤٹ ہوئے۔
اوپنر راچن رویندرا نے شاندار بیٹنگ کا مظاہرہ کرتے ہوئے ایک چھکے اور 13 چوکوں کی مدد سے 108 رنز کی اننگز کھیلی۔ وہ کاگیسو ربادا کی گیند پر ہینرک کلاسین کو کیچ تھما کر پویلین لوٹے۔
ان کے بعد کین ولیمسن بھی عمدہ کارکردگی کا مظاہرہ کرتے ہوئے دو چھکوں اور 10 چوکوں کی مدد سے 102 رنز بنا کر آؤٹ ہوئے۔
میچ سے پہلے میڈیا سے بات چیت کرتے ہوئے کپتان مچل سینٹنر کا کہنا تھا کہ ’لاہور کی پچ دبئی کے مقابلے میں مختلف ہے، یہاں پر پہلے کھیل چکے ہیں، کنڈیشنز کا اندازہ ہے۔‘
ان کا مزید کہنا تھا کہ ’ٹریول کے بعد کھلاڑیوں کو ریکوری کا موقع ملا اور سیمی فائنل کے لئے تیار ہیں۔‘
دوسری جانب جنوبی افریقہ کے کپتان ٹیمبا باووما کا میچ سے قبل سے کہنا تھا کہ ’دبئی جانا ضروری نہیں تھا، لاجسٹک کو مزید بہتر کیا جاسکتا تھا مگر شیڈول میں ہم زیادہ کچھ نہیں کر سکتے۔‘
انہوں نے کہا کہ ’دبئی میں کھلاڑیوں نے گالف کھیل کر انجوائے کیا اور ری کور کیا، نیوزی لینڈ کو یہاں کھیل چکے ہیں اس چیلنج کو پلان کے مطابق لیں گے۔‘
یاد رہے کہ دونوں ٹیمیں اب تک آئی سی سی ٹورنامنٹس میں 11 بار آمنے سامنے آ چکی ہیں، ان میں سے سات میں کیویز نے کامیابی حاصل کی۔
سنہ 2017 کے بعد سے دونوں ٹیموں کا صرف تین ون ڈے میچز میں سامنا ہوا جن میں سے دو ورلڈ کپ اور ایک حالیہ ٹرائنگولر سیریز کا میچ شامل ہے۔
یاد رہے کہ آج کا میچ جیتنے والی ٹیم اتوار کو دبئی میں شیڈولڈ ایونٹ کے فائنل میں انڈیا کے ساتھ مدمقابل ہو گی۔
جنوبی افریقہ کا سکواڈ
ٹیمبا باووما (کپتان)، رائن ریکلٹن، راسی وینڈر ڈوسن، ایڈن مارکرم، ہینرک کلاسین (وکٹ کیپر)، ڈیوڈ ملر، ویان ملڈر، مارکو یانسن، کیشو مہاراج، کاگیسو ربادا اور لونگی انگیدی جنوبی افریقہ کے سکواڈ میں شامل ہیں۔
نیوزی لینڈ کا سکواڈ
ول یانگ، راچن رویندرا، کین ولیمسن، ڈیرل میچل، ٹام لیتھم (وکٹ کیپر)، گلین فلپس، مائیکل بریس ویل، میچل سینٹر (کپتان)، میٹ ہیری، کائل جیمیسن اور ول او’رورک نیوزی لینڈ کے سکواڈ میں شامل ہیں۔