|
حالیہ برسوں میں ، تکنیکی جدت طرازی سے متاثر ہوکر ، چین
کے کئی علاقوں نے اعلیٰ معیار کی ترقی کے نئے راستے کو اپنایا ہے اور
اسمارٹ ماحول دوست صنعتوں کے فروغ سے نمایاں ثمرات حاصل کیے گئے ہیں۔ملک
بھر میں ہوا اور شمسی توانائی کی سہولیات کی تنصیب میں کئی گنا اضافہ ہوا
ہے، اور نئی توانائی کی گاڑیوں اور ہائیڈروجن توانائی کی صنعتی سلسلے میں
بہتری آئی ہے. کم کاربن کی تبدیلی نے نیلے آسمان اور صاف پانی کو بحال کیا
ہے اور ترقی کے نئے مواقع پیدا کیے ہیں۔
اعلی معیار کی ترقی نہ صرف چین کی جدیدکاری کی کلید ہے بلکہ غیر ملکی
کاروباری اداروں کے لئے بھی وافر مواقع پیش کر رہی ہے ، جس سے عالمی معاشی
بحالی کو تقویت مل رہی ہے۔مزید غیر ملکی کمپنیاں چین میں آر اینڈ ڈی اور
جدت طرازی کے مراکز قائم کر رہی ہیں ، جس سے ہائی ٹیک مینوفیکچرنگ میں غیر
ملکی سرمایہ کاری کو فروغ مل رہا ہے۔ قابل ذکر مثالوں میں شنگھائی میں
ٹیسلا کی انرجی اسٹوریج میگا فیکٹری، صوبہ آن ہوئی کے حہ فی میں ووکس ویگن
کا انٹیلی جنٹ وہیکل آر اینڈ ڈی سینٹر اور جیانگسو صوبے کے ووشی میں ایسٹرا
زینیکا کی نئی چھوٹی مالیکیول فیکٹری کی منصوبہ بندی وغیرہ شامل ہیں۔
ماہرین کا خیال ہے کہ یہ عوامل "چینی ساختہ" سے "چین میں تخلیق کردہ" کی
جانب تزویراتی تبدیلی کی عکاسی کرتے ہیں۔
اسی تناظر میں چینی جدیدیت کو آگے بڑھانے کے لیے جامع اصلاحات کو مزید گہرا
کرنے کی قرارداد کے مطابق چینی قیادت نے ایک بار پھر سائنس ٹیکنالوجی کی
جدت طرازی کے ذریعے معاشی محرک قوتوں کو تیار کرنے کے عزم کا اظہار کیا
ہے۔کمیونسٹ پارٹی آف چائنا کی 20 ویں سینٹرل کمیٹی کے تیسرے کل رکنی اجلاس
میں منظور کی گئی قرارداد میں کہا گیا ہے کہ چین کو ہر لحاظ سے ایک جدید
سوشلسٹ ملک بنانے کے لیے اعلیٰ معیار کی ترقی بنیادی کام ہے۔اس میں مقامی
حالات کے مطابق نئے معیار کی پیداواری قوتوں کو فروغ دینے کے لئے اداروں
اور میکانزم کو بہتر بنانے کا مطالبہ کیا گیا ہے اور اگلی نسل کی آئی ٹی ،
مصنوعی ذہانت ، ہوا بازی اور ایرو اسپیس ، نئی توانائی اور نئے مواد جیسی
اسٹریٹجک صنعتوں کے لئے پالیسیوں اور گورننس کو بہتر بنانے کا عہد کیا گیا
ہے۔
چینی قیادت کے نزدیک جدید ابھرتی ہوئی اور مستقبل کی صنعتوں کے ذریعے اعلیٰ
معیار کی ترقی کے حصول کے لئے پرعزم رہنا دراصل ملک کی جدیدکاری مہم کے لئے
ایک ذمہ دارانہ ، دانستہ اور سائنسی نقطہ نظر کی عکاسی کرتا ہے۔اس ضمن میں
اعلیٰ معیار کی ترقیاتی حکمت عملی نے پہلے ہی زبردست نتائج حاصل کیے ہیں.
2013 سے 2023 تک ، بڑے پیمانے پر ، ہائی ٹیک مینوفیکچرنگ انڈسٹری کی اضافی
قدر نے 10.3 فیصد کی مضبوط سالانہ ترقیاتی شرح کا تجربہ کیا ہے۔ 2023 میں
جدید مصنوعات کی پیداوار میں واضح اضافہ ہوا ، سروس روبوٹس ، سولر سیلز اور
تیز رفتار ٹرینوں کی پیداوار میں پچھلے سال کے مقابلے میں بالترتیب 23.3
فیصد ، 54 فیصد اور 63.2 فیصد اضافہ ہوا۔
اگرچہ چین عالمی تناظر میں ایک فائدہ مند صورتحال کی تشکیل اور تعاون کے
لئے اپنے دروازے مسلسل کھول رہا ہے ، تاہم ، ایسے عناصر بھی ہیں جو چین اور
باقی دنیا کے مابین ہائی ٹیک تعاون میں خلل ڈالنے کی مسلسل کوشش کر رہے ہیں
، جس کا مقصد چین کی ترقی میں رکاوٹ ڈالنا اور سائنس اور ٹیکنالوجی میں
اپنی بالادستی کو محفوظ بنانا ہے۔اس صورتحال کا سامنا کرتے ہوئے، چین
ٹیکنالوجی میں خود انحصاری اور خطرے پر قابو پانے والی صنعتی اور سپلائی
چینز کی تشکیل کے لئے پرعزم ہے۔سی پی سی کی 20 ویں سینٹرل کمیٹی کی نئی
منظور شدہ قرارداد میں بھی انٹیگریٹڈ سرکٹس، صنعتی مشین ٹولز، طبی
سازوسامان، بنیادی سافٹ ویئر اور صنعتی سافٹ ویئر سمیت اہم صنعتی زنجیروں
کو مضبوط بنانے پر زور دیا گیا ہے، جو سائنس ٹیکنالوجی کی جدت طرازی کے
بغیر حاصل نہیں کیے جا سکتے۔
|