کیش کا دور ختم
(Shahid Afraz Khan, Beijing)
|
چین میں موبائل پیمنٹ کی سہولت نے ہمہ وقت
کاغذی کرنسی ساتھ رکھنے کی جھنجھٹ کو یکسر ختم کرکے رکھ دیا ہے۔آج نہ صرف
چینی شہری بلکہ غیر ملکی افراد بھی اس سہولت سے وسیع پیمانے پر مستفید ہو
رہے ہیں اور یہ بات اچھی ہے کہ چینی حکومت گزرتے وقت کے ساتھ موبائل پیمنٹ
کے حوالے سے آپشنز میں بھی نمایاں اضافہ کر رہی ہے۔اس کی حالیہ جھلک ہمیں
حال ہی میں قومی دن کی تعطیلات کے دوران بھی دیکھنے میں آئی۔
صنعت کے ماہرین کا کہنا ہے کہ چین کے جدید موبائل پیمنٹ کے آپشنز نے قومی
دن کی تعطیلات کے دوران اندرون ملک سفر سے متعلق کھپت کی ایک نئی لہر کو
ہوا دی، جس سے عالمی سیاحت کی صنعت میں مزید توانائی پیدا ہوئی۔معروف آن
لائن ادائیگی پلیٹ فارم علی پے کے اعداد و شمار سے پتہ چلتا ہے کہ چین آنے
والے زائرین چین بھر میں سفر کے دوران موبائل ادائیگی کے طریقوں کو تیزی سے
اپنا رہے ہیں ، کیونکہ ہفتے بھر کی تعطیلات کے پہلے چار دنوں کے دوران پلیٹ
فارم پر موبائل پیمنٹ اخراجات میں سال بہ سال تقریبا 120 فیصد اضافہ ہوا۔
خاص طور پر 10 سے زائد ممالک اور خطوں کے سیاحوں کی جانب سے لین دین میں
نمایاں اضافہ دیکھا گیا۔ یہ اُن ممالک اور خطوں کے سیاح ہیں جنہیں گزشتہ
سال چین کی جانب سے ویزا کے بغیر رسائی دی گئی ہے۔ پلیٹ فارم کے مطابق ان
کے علی پے استعمال میں سال بہ سال تقریبا تین گنا اضافہ دیکھا گیا۔
دریں اثنا، چینی کاروباری ادارے بھی بین الاقوامی صارفین کی بڑھتی ہوئی آمد
کا فائدہ اٹھا رہے ہیں۔ غیر ملکی صارفین کے لئے علی پے استعمال کرنے والے
تاجروں کی تعداد 2023 میں اسی مدت کے مقابلے میں دگنی ہوگئی ہے۔رواں سال
قومی دن کی تعطیلات کے دوران غیر ملکی سیاحوں نے علی پے کے ذریعے جن خدمات
کا استعمال کیا ان میں رائیڈ ہیلنگ، بائیک شیئرنگ، فلائٹ اور ٹرین کی بکنگ
اور فوڈ ڈیلیوری وغیرہ شامل ہیں۔
چینی ماہرین کے خیال میں ویزا فری رسائی، پروازوں کی بحالی اور آسان موبائل
ادائیگیاں چین میں ان باؤنڈ سیاحت کے عروج کے اہم عوامل میں شامل ہیں۔اس سے
نہ صرف گھریلو کھپت میں اضافہ ہوگا، بلکہ عالمی سیاحت کی صنعت میں بھی نئی
حوصلہ افزائی ہوگی۔غیر ملکیوں کے لئے لین دین کو مزید آسان بنانے کے اقدام
کے طور پر ،چین کی اسٹیٹ ایڈمنسٹریشن فار مارکیٹ ریگولیشن اور نیشنل ڈیٹا
ایڈمنسٹریشن نے اعلان کیا تھا کہ آٹھ شہر انفرادی کاروباری مالکان کے لئے
موبائل ادائیگی پلیٹ فارم کو اپنانے کے نظام کو آسان بنانے کے لئے ڈیزائن
کردہ ایک پروگرام چلائیں۔اس سے متعلقہ شہروں میں انفرادی کاروبار غیر ملکی
کریڈٹ کارڈز کے ذریعے ادائیگی کے نظام کو بہتر طور پر اپنا سکیں گے۔موبائل
ادائیگی کے پلیٹ فارمز کو انفرادی کاروباری اداروں کی رجسٹریشن کی معلومات
تک رسائی حاصل نہیں ہے لہذا مرچنٹ پیمنٹ کوڈ ز کھولنے کا عمل وقت طلب
ہے۔چینی حکام کا کہنا ہے کہ نئے اقدام سے ایک کروڑ 10 لاکھ سے زائد انفرادی
کاروباری اداروں کے لیے ایسے کوڈز کھولنا آسان ہو جائے گا جو کل قومی
کاروباروں کا 9.3 فیصد ہیں۔
یہ بات خوش آئند ہے کہ چین غیر ملکی زائرین کے لئے ادائیگی کو آسان بنانے
کی خاطر زیادہ سے زیادہ کوششیں کر رہا ہے۔رواں سال مارچ میں ، چین کی اسٹیٹ
کونسل نے رہنما خطوط جاری کیے جن کا مقصد بینک کارڈ ادائیگیوں کی رسائی کو
بہتر بنانا ، نقد رقم کے استعمال کو فروغ دینا اور مسافروں کے لئے موبائل
ادائیگی کے اختیارات کو بڑھانا ہے۔چینی وزارت ثقافت و سیاحت کے مطابق رواں
سال کے پہلے نو ماہ کے دوران غیر ملکی سیاحوں کی جانب سے چائنیز مین لینڈ
کے تقریباً 95 ملین دورے ریکارڈ کیے گئے جو سالانہ اعتبار سے 55.4 فیصد
زیادہ ہیں۔ماہرین بین الاقوامی صارفین کے لئے موبائل ادائیگی کے اختیارات
کو بڑھانے کے لئے چین کی کوششوں کو ایک اہم پیش رفت قرار دیتے ہیں۔اُن کے
نزدیک ،اس تبدیلی سے نہ صرف انفرادی مسافروں اور تاجروں کو فائدہ پہنچے گا،
بلکہ موبائل ادائیگیوں کو اپنانے میں عالمی رہنما اور فن ٹیک میں عالمی
ترقی میں ایک اہم شراکت دار کے طور پر چین کی پوزیشن کو بھی تقویت ملے گی۔
|
|