رشتوں کو قربان نہ کریں
(Fazal khaliq khan, Mingora Swat)
| مادی آسائشوں کے پیچھے رشتوں کا تقدس ختم ہو رہا ہے، والدین پریشان اور اولاد مزید آسائشوں کے لیے سرگرداں، یہ سلسلہ کہاں رُکے گا اس پر سوچنے کی ضرورت ہے! |
|
|
فضل خالق خان (مینگورہ سوات)
ہم ایک ایسی دوڑ میں شامل ہو چکے ہیں جس کی منزل دولت ہے، اور قیمت رشتے۔ ہم صبح و شام صرف اس لیے محنت کر رہے ہیں کہ چند سِکے، کچھ سہولتیں اور تھوڑی سی آزادی کما سکیں۔ لیکن اس دوڑ میں ہم بھول گئے ہیں کہ سکون صرف بینک بیلنس میں نہیں ہوتا، بلکہ اُن چہروں میں چھپا ہوتا ہے جو ہمارے ساتھ جیتے اور ہمارے لیے جیتے ہیں۔
کہیں بیٹا ماں باپ کو تنہا چھوڑ کر دیارِ غیر کی پرکشش دنیا میں جا چکا ہے، کہیں شوہر بیوی سے دور روزگار کے جھمیلوں میں الجھا ہوا ہے، تو کہیں بیوی، بچوں کی بہتر زندگی کے لیے شوہر سے جدا ہو چکی ہے۔ بھائی، جو بچپن میں ایک بستر پر سویا کرتے تھے، اب سالوں سے ملے نہیں۔ یہ ہے ہماری ترقی کی قیمت۔
ہم نے جو کچھ کمایا، وہ گن سکتے ہیں: ایک پلاٹ، کچھ زیور، بچوں کی اچھی تعلیم، بیمے کی رقم اور بینک میں کچھ جمع پونجی۔ لیکن جو کچھ ہم نے کھویا، وہ نہ گنا جا سکتا ہے، نہ تولا جا سکتا ہے۔ ماں کی دعائیں، باپ کی خاموش فکریں، شریکِ حیات کی قربت، بچوں کی شرارتیں، بہن بھائیوں کی بےلوث محبت،یہ سب ہم نے چھوڑ دیے ہیں صرف ایک بہتر زندگی کے خواب میں۔
زندگی کی سب سے بڑی محرومی یہ نہیں کہ ہمارے پاس گاڑی نہیں یا بنگلہ نہیں… سب سے بڑی محرومی تب ہوتی ہے جب بیمار پڑیں تو تیمار داری کے لیے کوئی اپنا پاس نہ ہو، اور جب آنکھیں ہمیشہ کے لیے بند ہو جائیں تو ہمارے جنازے کو کندھا دینے والا کوئی خون کا رشتہ موجود نہ ہو۔
ہم جس کامیابی کو ترقی کہتے ہیں، وہ دراصل ایک تنہا جزیرہ ہے۔ وہاں شور بہت ہے، سہولتیں بھی بے شمار ہیں، لیکن دل کی خاموشیوں کو سننے والا کوئی نہیں۔
اس لیے وقت ہے رکنے کا، سوچنے کا، اور لوٹ آنے کا… اُن کے پاس جن کے بغیر ہم کچھ نہیں۔کمائی ضرور کریں، لیکن رشتوں کو قربان نہ کریں۔زندگی اُن کے ساتھ جینے کا نام ہے جن کے بغیر جینا ادھورا ہے۔
رہنے دو ترقی کو تھوڑی دیر کے لیے،
اور تھام لو اُن ہاتھوں کو جو تمہیں سچ میں چاہتے ہیں۔ |
|