اتراکھنڈ میں سانحہ در سانحہ

اتراکھنڈ کے دشوارگزار پہاڑی علاقوں میں 17جون کی صبح تباہی کا جو ہولناک واقعہ پیش آیا اس کو قہر خداوندی لکھتے ہوئے کلیجہ کانپتا ہے۔ اس خطے میں ہزاروں مندر ہیں، انہی مندروں کی وجہ اس خطے کو ’دیوبھومی‘ یعنی دیوتاﺅں کی بھومی بھی کہا جاتا ہے ،مگر خاص مندر چارہیں۔ سب سے اہم اور قدیم کیدارناتھ مندرہے جو مندانکنی دریا کے کنارے ہے۔ اس میں شِو کی پوجا ہوتی ہے۔ دوسرا بدری ناتھ ہے جس کے دیوتا وشنو ہیں ۔ دریائے گنگا کے منبع پر گنگوتری مندرہے جو گنگا دیوی کو مخصوص ہے اور جمنا کے منبع پر جمنوتری ہے جو جمنا دیوی کے نام ہے۔ایک زمانہ وہ تھا جب دنیا و مافہیا سے بے نیاز جوگی اور سادھولوگ عبادت وریاضت کے لئے یہاں آتے۔ زمانہ بدلا ، راستے بنے تو ملک بھر سے بڑی تعداد میں عقیدت مند ’چار دھام ‘کی یاتراکرنے یہاں آنے لگے۔ اسی خطے میں ایک گرودوارہ ’ہیم کنڈصاحب‘ بھی ہے جہاں دسویں سکھ گرو نے ریاضت کی تھی۔ صرف گرمیوں میں اس کا راستہ کھلتا ہے اور سکھوں کی اہم زیارت گاہ ہے۔

یہ خطہ ہمالیہ کی گود میں ہے اور برف پوش پہاڑیوں کا نظارہ خصوصاً طلوع اور غروف آفتاب کے وقت بڑا ہی پرکشش ہوتا ہے ۔ کچھ پہاڑیاں ایسی بھی ہیںجن پر شائقین کوہ پیمائی کرتے ہیں۔ گویا یہ مذہبی اور تفریحی دونوں طرح کی سیاحتوں کا خطہ ہے۔گرمیوں میںبھی ٹھنڈا رہتا ہے اور خوب ہرابھرا ہے ۔چنانچہ مئی جون میںآنے والوں کاہجوم خوب ہوتا۔ وسط جون میں سیاحوں کی آمد شباب پرہوتی ہے چنانچہ 17 جون کو جب یہ قہر آسمانی نازل ہوا، ایک لاکھ سے زیادہ یاتری اس خطے میں موجود تھے۔

سیاحت ہی یہاں باشندوں کی آمدنی کا خاص زریعہ ہے۔ بڑی تعداد میں ہوٹل اورموٹل بن گئے ہیں۔لوگ اپنے گھروں کو مہمان خانوں میں تبدیل کردیتے ہیں۔ دوردور تک دھابے، ہوٹل چائے خانے بن گئے ہیں، بازار سج گئے ہیں اور خوب کمائی ہوتی ہے۔ خچر پر یاتریوںکو لانے لیجانے کا معاوضہ ہزاروں میں وصول کیا جاتا ہے۔ ایک نجی ہیلی کاپٹر سروس بھی کامیابی سے چل رہی تھی۔ اس پس منظر کو ذہن میں رکھئے اور دیکھئے یہ جو تباہی آئی ہے اس کامطلب کیا ہے؟

اس خطے میں مانسون کے پورے موسم میں اوسطاً 5.6 سینٹی میٹربارش ہوتی ہے برسات کا موسم جون کے آخر میں شروع میں ہوتا ہے۔ وسط جون میں ہلکی پھلکی بارش کا تو امکان رہتا ہے مگر ایسی بارش کہ چندگھنٹوں تقریباً 34 سنٹی میٹر پانی گرگیاجو پورے سال کی کل بارش سے چھ گنازیادہ ہے، تصور سے باہر ہے۔17جون کو علی الصبح بلند پہاڑیوں سے یخ بستہ پانی کا جو ریلہ آیا وہ اپنے ساتھ ہزاروں ٹن مٹی اورپتھر بھی بہا لایا۔ بعض پتھر تو کار کے سائز سے بھی بڑے تھے اور پانی کے آگے اس طرح بہہ رہے تھے جیسے پتھر نہ ہوں، روئی کے گالے ہوں۔ ساتھ برف کے بڑے بڑے تودے بھی تھے جو گلیشیر کے پھٹ پڑنے سے بہہ نکلے تھے۔پانی کی تیز رفتار ی نے دیکھتے ہی دیکھتے دریاﺅں کے کناروں کو کاٹ دیا اور سمنٹ کنکریٹ سے تعمیر کم سے کم365 کثیر منزلہ عمارتوں کو یوںلڑھکاکر پانی میں بہادیا جیسے گارے مٹی کے بنے ہوں ۔ہزاروں مکان ناقابل رہائش ہوگئے۔ نیچے کی منزلیں تقریبا پوری کیچڑ سے بھر گئیں۔پارکنگ میں کھڑی ہوئی کاریں اور بسیں اس طرح دریا میںبہتی ہوئی دکھائی دیں گویا کاغذکے کھلونے ہوں۔