باغبان

(Mudassar Faizi, Lahore)

قدرت نے انسانی رشتوں کی تخلیق کر کے انسانیت پر بہت بڑا احسان کیا ہے۔ جس طرح ایک مالی اپنے باغ کے پودوں کو اگاتا ہے، ان کو پانی دیتا ہے، اپنا وقت، محنت اور پیسہ خرچ کر کے ان کی آبیاری کرتا ہے، اسی طرح شادی کے بعد بچوں کی پیدائش کے بعد ایک باپ بالکل باغبان کی طرح اپنے خون پسینے اور محنت سے کمائی ہوئی رقم خرچ کر کے اپنے بچوں کی تعلیم و تربیت کرتا ہے، ان کو زندگی کی تمام سہولیات بہم پہنچاتا ہے، اس کے لئے نہ وہ دن دیکھتا ہے نہ رات دیکھتا ہے، نہ اپنی صحت دیکھتا ہے نہ اپنی ذات، اس کا ہر ہر لمحہ اس فکر میں گزرتا ہے کہ کس طرح وہ اپنے بچوں کی اچھی پرورش کر سکتا ہے، کس طرح ان کو زندگی گزارنے کے لئے دنیا جہان کی نعمتیں دے سکتا ہے۔ اسی لئے تو اللہ تعالیٰ نے بھی باپ اور ماں کو بچپن میں ان کی اولاد کے لئے پالنے والا قرار دیا ہے۔ حالانکہ اللہ تعالیٰ کی ذات تمام جہانوں کو پالنے والی ہے لیکن اللہ تعالیٰ نے اولاد کے لئے والدین خصوصاً باپ کو ایسی ذمہ داریاں سونپی ہیں جس میں ”ربوبیت“ کا عنصر بھی شامل ہوتا ہے۔ اللہ تعالیٰ نے قرآن کریم میں بھی جگہ جگہ والدین کی عزت و تکریم کے حوالے سے ارشادات کئے ہیں، احادیث نبوی میں بھی والدین کے حقوق کا بہت ذکر ہے یہاں تک کہ ایک باپ کو حق دیا گیا ہے کہ وہ تین بار اپنے بیٹوں کے گھر کا مکمل صفایا کر سکتا ہے یعنی جو چیز بھی وہ مانگے اس کا حق ہے اور وہ بیٹے کی اجازت کے بغیر بھی اس کا تمام مال تین بار لے سکتا ہے۔ ہمارے مشرقی اور خصوصاً اسلامی معاشرے میں بھی والدین کے حقوق ادا کرنے کی بہت تاکید کی جاتی ہے۔

کچھ عرصہ پہلے تک ہمارے یہاں فادرز ڈے اور مدرز ڈے منانے کا کوئی رواج نہ تھا کیونکہ اسلامی معاشرے میں ہر دن ہی فادرز ڈے بھی ہوتا ہے اور مدرز ڈے بھی کیونکہ ماں اور باپ سے محبت کوئی ایسا عمل نہیں ہے جو سال میں صرف ایک دن کیا جائے! بہرحال کچھ عرصہ پیشتر تک پاکستان کے عوام کی اکثریت ایسے دنوں کو منانے کے معاملے میں شاید دنیا میں سب سے پیچھے تھی اور خصوصاً راقم کو تو ایسے کسی دن کے دنیا بھر میں منائے جانے کا کچھ علم نہ تھا جب تک کہ برادرم جواد فیضی نے پاکستان سے ہجرت نہیں کی تھی اور جون 2003 میں فادرز ڈے کا کارڈ والد محترم کو نہیں بھیجا تھا۔ میرے والد محترم اپنی زندگی کے آخری ایام میں جواد فیضی اور اس کے بچوں کی دوری کی وجہ سے بہت دل گرفتہ اور اداس رہتے تھے، وہ اکثر ہم سے کہا کرتے تھے کہ ”مجھے لگتا ہے کہ تم سب جواد کے بچوں سے ملو گے لیکن میں نہیں مل پاﺅں گا“ چنانچہ ان کا کہنا سچ ثابت ہوا اور وہ ان بچوں سے ملنے کو ترستے ہوئے، ان کو اپنے سینے سے لگانے کے لئے تڑپتے ہوئے دار فانی سے کوچ کرگئے۔ والد صاحب کی وفات حسرت آیات سے پہلے جو آخری فادرز ڈے تھا اس دن ہم نے ان کو بہت خوش دیکھا، لگتا تھا کہ جیسے کوئی خزانہ ان کے ہاتھ آگیا ہو، جب استفسار کیا گیا تو پتہ چلا کہ آج ان کے چہیتے اور لاڈلے بیٹے کا ”فادرز ڈے“ کے حوالے سے کارڈ موصول ہوا ہے۔ ہمیں کیا معلوم تھا کہ وہ اگلے فادرز ڈے سے پہلے ہی ہمیں غمزدہ کرتے ہوئے اتنا دور چلے جائیں گے کہ نہ واپسی کا کوئی راستہ ہوگا اور نہ امید۔ ہم قیامت تک ان کے محبت بھرے لمس کو ترستے رہیں گے، سسکتے رہےں گے!

آج پھر فادرز ڈے ہے اور میں سوچتا ہوں کہ میرے جیسے کتنے بدنصیب بیٹے ہوں گے جو فادرز ڈے پر کوئی تحفہ نہ دے سکیں گے، کوئی کارڈ نہ بھیج سکیں گے، اپنے والد سے "I Love You" نہ کہہ سکیں گے کتنے بدقسمت ہیں وہ لوگ جن سے ان کے باپ کا سایہ چھن گیا، وہ باغبان چھن گیا جس کے ہوتے ہوئے کوئی غم پاس نہیں آتا، کوئی دکھ پاس نہیں پھٹکتا۔ ہر باپ کی طرح میرے والد صاحب کو بھی مجھ سے بہت پیار تھا.... پیار تو ہر باپ اپنی اولاد سے کرتا ہے، لیکن ان کے پاس اظہار کا سلیقہ اور قدرت تھی۔ مجھے یاد نہیں پڑتا کہ کسی ضرورت کی چیز بلکہ کسی بھی چیز کا مطالبہ کرنا پڑتا ہو، وہ میری ضروریات سے مکمل آگاہ رہتے تھے، میرے کہنے یا فرمائش کی ضرورت ہی نہیں پڑتی تھی اور ہر چیز مجھے مل جاتی تھی۔ بچپن سے سکول، کالج اور یونیورسٹی کی تعلیم کے دوران اور اس کے بعد اپنی وفات تک وہ میرے نگہبان بھی تھے اور باغبان بھی۔ میں آٹھویں جماعت میں زیر تعلیم تھا کہ مجھے گردن توڑ بخار ہوگیا، ایک سے ایک بڑے ڈاکٹر کو دکھایا گیا لیکن سب نے یہی کہا کہ بس آپ دعا کریں، حقیقتاً ڈاکٹرز نے مایوسی کا اظہار کردیا تھا لیکن یہ میرے والد محترم کی دعا کی اثر انگیزی تھی، ان کی رقت تھی اور اللہ تعالیٰ کی ذات پر غیر متزلزل یقین تھا جس کی وجہ سے مجھے نئی زندگی ملی۔ انہوں نے میری بیماری کی حالت میں اللہ تعالیٰ سے منت مانگی کہ ”یا اللہ! تو میرے بیٹے کو صحت یاب کر، میں اسے تیرے گھر کی زیارت اور عمرہ کے لئے لے کر آﺅں گا“ اور انہوں نے حالات سازگار ہوتے ہی ایسا کیا اور مجھے عمرہ کی سعادت حاصل ہوئی! کس کس بات کو یاد کریں کہ حقیقت میں ایک باغبان تھے۔ ہر والد، ہر باپ اپنی اولاد کے لئے باغبان کا درجہ رکھتا ہے۔ یتیمی کی زندگی بہت قابل رحم ہوتی ہے، یہ کوئی ان سے پوچھے جو ایسی زندگی بسر کررہے ہیں۔

مجھے فادرز ڈے کے حوالے سے ایک ٹی وی چینل پر ایک پروگرام دیکھ کر بہت دکھ اور تکلیف سے گزرنا پڑا۔ مغرب کہ جہاں سے ایسے دن منانے کی رسم ہمارے یہاں وارد ہوئی ہے اسی مغرب کی اندھی تقلید میں اب پاکستان میں بھی اولڈ ہوم (دار الکفالہ) بننے شروع ہوگئے ہیں۔ اس میں چند بوڑھے اشخاص کو وہاں زندگی گزارتے ہوئے دکھایا گیا تھا۔ اس میں ایک صاحب رو بھی رہے تھے اور اپنی دکھ بھری کہانی بھی سنا رہے تھے کہ کس طرح ان کے جوان بیٹوں نے ان کو اپنے گھر میں رکھنے کی بجائے اولڈ ہوم میں ”جمع “کرا رکھا ہے اور وہ کیسے اپنے پوتوں اور پوتیوں کو دیکھنے کو ترس جاتے ہیں، ان صاحب کی باتیں سن کر روح تک لرز گئی کہ یا الٰہی ایسی اولاد بھی ہے جو اپنے والد کے ساتھ ایسا سلوک کرے؟ کوئی ہم جیسے ”یتیموں“ سے پوچھے کہ والد کی کیا اہمیت اور حیثیت ہوتی ہے، ارے بدبختو! بچو اس دن سے جب تمہارے بچے بھی تمہارے ساتھ ایسا کریں گے؟ اللہ کی لاٹھی بہت بے آواز ہے، اس کے یہاں دیر تو ہو سکتی ہے لیکن اندھیر ہرگز نہیں۔ آج جو بویا جائے گا، کل وہی کاٹا بھی جائے گا۔ اس لئے ڈرنا چاہئے اس وقت سے جب اسی دنیا میں اعمال کا بدلہ دے دیا جائے گا۔ ہمیں چاہئے کہ صرف سال بعد ہی ایسے دن نہ منائیں بلکہ سارا سال اپنے والدین کی خدمت کریں، ان کے دکھ سکھ بانٹیں اور ان کی دعائیں لیں۔ ہر دن کو فادرز ڈے اور مدرز ڈے سمجھیں۔ ہماری دنیا اور آخرت کی بھلائی اسی میں ہے۔

اور آخر میں والد گرامی کے انتقال کے بعد کہے جانے والے چند اشعار

سونی سونی ہر گلی ہے، لٹ گئی ہیں محفلیں
کس طرف دیکھیں کہ اب تو کھو گئی ہیں منزلیں

گلشن ہستی میں پہلے تھیں بہاریں جاں فضائی
اور اب سنسان جنگل، جا چکیں سب بلبلیں

آپ کے ہونے سے کیسے زندگی خوش باش تھی
آپ کے جانے سے لیکن ماند ہیں سب رونقیں

آپ تھے تو دیکھنا بھی حج و عمرے کا ثواب
آپ بن اب عمر بھر کی رہ گئی ہیں خلوتیں

میرے مولا! تیرے آگے کس کی چلتی ہے یہاں؟
کیا تیرا جاتا، اگر تو مان لیتا منتیں؟

اے میرے مالک! تیری مرضی تھی جو کچھ بھی ہوا
غلطیاں سب معاف کردے، دے دے ان کو جنتیں

< PREVIOUS تیس مار خان NEXT > بحیرہ مردار

Comments

24 Jun, 2009

About the Author: Mudassar Faizi Read More Articles by Mudassar Faizi: 212 Articles with 234353 views Currently, no details found about the author. If you are the author of this Article, Please update or create your Profile here.

Add Your Article

Article Categories

Politics سیاست Society & Culture معاشرہ اور ثقافت Religion مذہب Other/Miscellaneous متفرق Literature & Humor ادب و مزاح Education تعلیم Health صحت Famous Personalities مشہور شخصیات Science & Technology سائنس / ٹیکنالوجی Novel افسانہ Sports کھیل True Stories سچی کہانیاں Books Intro تعارفِ کتب Travel & Tourism سیر و سیاحت Career کیریر Entertainment انٹرٹینمنٹ Kids Corner بچوں کی دنیا Poetry شعر و شاعری 100 Lafzon Ke Kahani سو لفظوں کی کہانی Young Writers نوجوان قلم کار Arts ہنر Military Democracy سول فوجی جمہوریت Hamariweb Writers Club ہماری ویب رائٹرز کلب

Recent Society & Culture Articles

بجلی سستی مگر سلیب سسٹم کا جال باقی!

ہم خود کو کیوں نہیں بدلتے؟

ذات پات کا نظام اور ہماری کھوکھلی ہوتی شناخت

اسرائیلی دہشت گردی اور مظلوم نہتے فلسطینی

View all Society & Culture Articles