بہترین انٹرویو کیسے دیا جائے؟

نوجوانوں کے لئے ملازمت کا انٹرویو بہت زیادہ اہمیت کا حامل ہوتا ہے۔ بِلاشبہ آپ اس بات کا اندازہ پہلے سے نہیں لگا سکتے کہ ملازمت کے لیے آپ سے لیا جانے والا انٹرویو کیسا رہے گا اور آپ کو کن کن سوالوں کے جواب دینا پڑیں گے۔ ایسا بھی ممکن ہے کہ آپ سے ملازمت کے لیے انٹرویو لینے والا شخص آپ پر ایک کے بعد دوسرے مشکل سوال کی بوچھاڑ کر دے۔ یہ بھی ممکن ہے کہ آپ سے ملازمت کے لیے انٹرویو لینے والا شخص انٹرویو کو ایک زیادہ آرام دہ اور دو طرفہ فطری گفتگو میں بدل دے۔ اکثر لوگ بے شمار امکانی سوالوں کے جواب یاد کرتے ہیں۔ اس عمل میں دشواری یہ ہے کہ اس طرح بعض نوجوان ضرورت سے زیادہ تیاری کر لیتے ہیں اور پھر جواب ایسے دیتے ہیں جیسے آپ جیتے جاگتے انسان نہیں کوئی روبوٹ ہیں۔ ماہرین نے اس موضوع پر گہری تحقیق کر کے پتا چلایا ہے کہ حقیقت میں آپ کو ملازمت کے لیے انٹرویو میں کامیابی کی خاطر صرف تین سوالوں کی تیاری کرنے کی ضرورت ہے۔ آپ ان تین سوالوں کے جوابات کی تیاری کر کے ملازمت کے لیے انٹرویو میں پوچھے گئے باقی تمام سوالوں کے جواب دے سکتے ہیں۔ نوجوانوں کی رہنمائی کے لیے دنیا میگزین کی شائع کردہ یہ رپورٹ ہماری ویب کے قارئین کے لیے بھی پیشِ خدمت ہے-

تین بنیادی سوال
دراصل ملازمت کے لیے انٹرویو لینے والا ہر شخص تین بنیادی چیزیں جاننا چاہتا ہے۔ وہ تین چیزیں یہ ہیں: (1) آپ کو جس کام کے انجام دینے کے لیے ملازم رکھنا مقصود ہے، کیا آپ وہ کام انجام دینے کی مہارت اور تجربہ رکھتے ہیں؟
(2) آپ کو جس کام کے انجام دینے کے لیے ملازم رکھا جا رہا ہے، کیا آپ کو اس کام اور کمپنی سے دلچسپی ہے اور کیا آپ اس کے لیے پُرجوش ہیں؟
(3) کیا آپ پہلے سے کام کرنے والے ملازموں کے ساتھ ٹیم کے ایک رکن کی طرح مل کر کام کر سکیں گے اور کمپنی کی اقدار اور ماحول سے ہم آہنگ ہو سکیں گے؟

یہ بات اپنی جگہ درست کہ ملازمت کے لیے انٹرویو میں عموماً مذکورہ بالا تین بنیادی سوال پوچھے جاتے ہیں لیکن ملازمت کے لیے انٹرویو کے دوران انٹرویو لینے والا نہ صرف مختلف سوال پوچھ سکتا ہے بلکہ وہ مختلف زاویوں سے بھی سوال پوچھ سکتا ہے؟ وہ یہ جانچنے کے لیے بھی ایک سوال مختلف زاویوں سے پوچھ سکتا ہے کہ آپ اس سوال کا درست جواب واقعی جانتے ہیں یا نہیں۔

تین بنیادی سوالوں کی معنویت
1۔ آپ کو جس کام کے انجام دینے کے لیے ملازم رکھنا مقصود ہے، کیا آپ وہ کام انجام دینے کی مہارت اور تجربہ رکھتے ہیں؟
آپ نے جس ملازمت کے حصول کے لیے درخواست دی ہے، اس کے لیے درکار مہارتوں اور تجربے کے بارے میں سوچیے اور جائزہ لیجیے کہ آپ اس اعتبار سے کس درجے پر پورا اترتے ہیں۔ جائزہ لیجیے کہ آپ میں وہ تیکنیکی مہارتیں ہیں جن کا تقاضا ملازمت دینے والے نے کِیا ہے۔ اس کے علاوہ ملازمت کے لیے درکار عمومی مہارتوں میں شامل ہیں اپنے خیالات کے اظہار میں مہارت، انفارمیشن ٹیکنالوجی (آئی ٹی) میں مہارت، ٹیم کے رکن کی حیثیت سے کام انجام دینے میں مہارت وغیرہ۔ آپ اس سوال کا جواب دینے کی تیاری کر لیں گے تو آپ کو انٹرویو کے دوران پوچھے جانے والے کئی دوسرے سوالوں کے جواب دینے میں بھی آسانی ہو جائے گی اور اس عمل کے دوران آپ پٹری سے اتر کر غیرمتعلق معاملات و موضوعات پر بات بھی نہیں کریں گے۔ جب آپ کو اس قِسم کے خوف زدہ کر دینے والے (اور بعض اوقات احمقانہ) سوالوں کے جواب دینا پڑیں تو ہمیشہ کلیدی مہارتوں اور تجربے کی بنیاد پر ان کا جواب دیں۔ یعنی اپنے بارے میں بتایئے؟ آپ کی سب سے اہم خوبیاں اور خامیاں کون کون سی ہیں؟ آپ ہمارے لیے ایسا کیا کام انجام دے سکتے ہیں جو دوسرے امیدوار انجام نہیں دے سکتے؟ کیا آپ کا خیال ہے کہ آپ اس ملازمت کے لیے سب سے موزوں ہیں؟ آپ کا کیا خیال ہے اس ملازمت کے دوران بڑے چیلنج کون کون سے ہوں گے؟ وغیرہ وغیرہ۔

2۔ آپ کو جس کام کے انجام دینے کے لیے ملازم رکھا جا رہا ہے، کیا آپ کو اس کام اور کمپنی سے دلچسپی ہے اور کیا آپ اس کے لیے پُرجوش ہیں؟
ہر ملازمت دینے والا یہ جاننا چاہتا ہے کہ آپ کو کمپنی سے دلچسپی ہے اور یہ کہ کیا آپ اس کمپنی میں کام کرنے کے خیال سے پُرجوش ہیں۔ چناں چہ آپ کو یہ ظاہر کرنا ہو گا کہ آپ کمپنی کے بارے میں تحقیق کر چکے ہیں، آپ اس کی حکمتِ عملی، موجودہ کارکردگی، اس کے ڈھانچے، منڈی میں اس کے مقام اور اس کی مصنوعات کے بارے میں ضروری حقائق جان چکے ہیں اور یہ کہ اس آگاہی نے آپ کو اتنا پُرجوش کر دیا ہے کہ آپ فوراً کمپنی میں ملازمت اختیار کرنا چاہتے ہیں۔ آپ کو چاہیے کہ ملازمت کے لیے درخواست دینے سے بھی پہلے کمپنی کے بارے میں معلومات حاصل کر لیں۔ اس سلسلے میں کمپنی کی ویب سائٹ پر ’’اباؤٹ اَس‘‘ (about us) والے حصے کا مطالعہ ضرور کیجیے۔ اس کے علاوہ کمپنی کی ویب سائٹ پر کمپنی کی تاریخ، کمپنی کی کاروباری حکمتِ عملی سے متعلق تازہ ترین دستاویزات، سالانہ رپورٹوں اور کلیدی اعدادوشمار وغیرہ کا بھی مطالعہ کیجیے۔ ان پر واضح کیجیے کہ آپ انہیں جانتے ہیں۔ اس طرح آپ اس قِسم کے سوالوں کے جواب دینے کے اہل ہو جائیں گے: آپ ہماری کمپنی کے بارے میں کیا جانتے ہیں؟ آپ کا کیا خیال ہے ہماری کمپنی کیا حاصل کرنا چاہتی ہے؟ آپ ہماری مصنوعات اور خدمات کے بارے میں کیا جانتے ہیں؟ آپ اس کمپنی کے لیے کام کیوں کرنا چاہتے ہیں؟ آپ یہ کیوں سوچ رہے ہیں کہ آپ اس ملازمت کے لیے موزوں ہیں؟ کون کون سی چیزیں آپ کو عمل کی تحریک دیتی ہیں؟

3۔ کیا آپ پہلے سے کام کرنے والے ملازموں کے ساتھ ٹیم کے ایک رکن کی طرح مل کر کام کر سکیں گے اور کمپنی کی اقدار اور ماحول سے ہم آہنگ ہو سکیں گے؟
یہ آخری کلیدی سوال آپ کی شخصیت اور آپ کے اندازِ کار سے متعلق ہے۔ اس سوال کا تعلق اس بات سے ہے کہ آپ ٹیم میں گھُل مِل جانے اور کمپنی کی اقدار اپنانے اور اس کے ماحول میں رچ بس جانے والے شخص ہیں یا نہیں۔ مختلف کمپنیوں کی اقدار اور ماحول مختلف ہوتا ہے جس کا اظہار ان کے مختلف رویّے اور طرزِ کار سے ہوتا ہے۔ یہ بات یقینی طور سے جاننا ضروری ہے کہ آپ کمپنی کے ماحول سے ہم آہنگی اختیار کر سکتے ہیں اور ملازمت کے دوران آپ کی کیفیت اس مچھلی جیسی نہیں ہو گی جو پانی سے باہر ہو۔ حقیقت تو یہ ہے کہ یہ چیز نہ صرف آپ کے لیے بلکہ کمپنی کے لیے بھی اہمیت کی حامل ہے۔ یہ بات دوبارہ کہی جاتی ہے کہ ملازمت کے لیے درخواست دینے سے پہلے تھوڑی بہت تحقیق ضرور کر لیجیے۔ بعض اوقات کمپنیوں کے ماحول کے بارے میں معلومات حاصل کرنا مشکل ہوتا ہے۔ ایسی صورت میں آپ کو چاہیے کہ اپنے اندازے بیان کر کے یہ بتائیے کہ کمپنی کا ماحول ایسا ہو تو آپ اس سے کس طرح ہم آہنگی اختیار کر سکتے ہیں۔ مختلف کمپنیوں کے بارے میں جاننے کے لیے ایک نئی ویب سائٹ بہت کارآمد ہے۔ یہ ویب سائٹ ہے گلاس ڈور (Glassdoor)۔ اگرچہ یہ ویب سائٹ اپنے ابتدائی ایام میں ہے تاہم اس پر مختلف کمپنیوں کے بارے میں زیادہ سے زیادہ ڈیٹا اپ لوڈ کیا جا رہا ہے جس کی مدد سے آپ جان سکتے ہیں کہ مختلف کمپنیوں کا ماحول کیسا ہے اور ان کمپنیوں میں کام کرنے کا تجربہ کیسا ہو سکتا ہے۔ آپ کو چاہیے کہ کمپنی کی اقدار اور ماحول کے بارے میں جاننے کے ساتھ ساتھ اس بات کا بھی جائزہ لیجیے کہ اس کمپنی کی اقدار اور ماحول آپ کے شخصی اوصاف، انداز اور رویّوں سے کس حد تک ہم آہنگ ہیں۔ جب آپ اس طرح سے تیاری کر لیں گے تو آپ ایسے سوالوں کے جواب دے سکیں گے: اپنا کام انجام کرنے کا انداز بتائیے۔ آپ اپنے بارے میں بتائیے۔ آپ کے ساتھ کام کرنے والے آپ کے بارے میں کیا کہتے ہیں؟ آپ کس طرح ہماری کمپنی میں رچ بس سکیں گے؟ آپ ٹیم کے اچھے رکن کس طرح بن سکتے ہیں؟ اگر آپ جانور ہوتے تو کون سا جانور ہوتے؟

بِلاشبہ ہر انٹرویو کے دو پہلو ہوتے ہیں۔ ملازمت دینے والا جاننا چاہتا ہے کہ آپ کمپنی کے لیے موزوں ہیں یا نہیں۔ اسی طرح آپ بھی یہ جاننا چاہتے ہیں کہ کمپنی آپ کے لیے موزوں ہے یا نہیں۔ آپ کو ان سوالوں پر بھی غور کرنا چاہیے: کیا میں اس کمپنی کی ملازمت اختیار کر کے اپنی مہارتیں بہترین انداز سے استعمال کر سکتا ہوں؟ کیا یہ کمپنی مجھے شخصی ارتقا کے مواقع مہیا کرے گی؟ کیا کمپنی اس بات پر خوش ہے کہ میں اس کے لیے کام کر رہا ہوں؟ کیا کمپنی مجھے اچھی تنخواہ دے گی؟ کیا کمپنی کی اقدار اور ماحول ایسا ہے کہ مجھے پنپنے اور اپنی خواہشات کے مطابق جینے کے مواقع ملیں؟ اگر آپ اپنے زاویے سے ضروری سوال پوچھیں گے تو اس طرح آپ کا انٹرویو زیادہ متوازن بن جائے گا اور آپ انٹرویو لینے والے کے ساتھ زیادہ فطری گفتگو کر سکیں گے۔

< Previous ذاتی کاروبار کرنے کے چند انوکھے طریقے NEXT > لوگ زندگی میں ناکام کیوں ہوتے ہیں؟