بہترین انٹرویو کیسے دیا جائے؟

نوجوانوں کے لئے ملازمت کا انٹرویو بہت زیادہ اہمیت کا حامل ہوتا ہے۔ بِلاشبہ آپ اس بات کا اندازہ پہلے سے نہیں لگا سکتے کہ ملازمت کے لیے آپ سے لیا جانے والا انٹرویو کیسا رہے گا اور آپ کو کن کن سوالوں کے جواب دینا پڑیں گے۔ ایسا بھی ممکن ہے کہ آپ سے ملازمت کے لیے انٹرویو لینے والا شخص آپ پر ایک کے بعد دوسرے مشکل سوال کی بوچھاڑ کر دے۔ یہ بھی ممکن ہے کہ آپ سے ملازمت کے لیے انٹرویو لینے والا شخص انٹرویو کو ایک زیادہ آرام دہ اور دو طرفہ فطری گفتگو میں بدل دے۔ اکثر لوگ بے شمار امکانی سوالوں کے جواب یاد کرتے ہیں۔ اس عمل میں دشواری یہ ہے کہ اس طرح بعض نوجوان ضرورت سے زیادہ تیاری کر لیتے ہیں اور پھر جواب ایسے دیتے ہیں جیسے آپ جیتے جاگتے انسان نہیں کوئی روبوٹ ہیں۔ ماہرین نے اس موضوع پر گہری تحقیق کر کے پتا چلایا ہے کہ حقیقت میں آپ کو ملازمت کے لیے انٹرویو میں کامیابی کی خاطر صرف تین سوالوں کی تیاری کرنے کی ضرورت ہے۔ آپ ان تین سوالوں کے جوابات کی تیاری کر کے ملازمت کے لیے انٹرویو میں پوچھے گئے باقی تمام سوالوں کے جواب دے سکتے ہیں۔ نوجوانوں کی رہنمائی کے لیے دنیا میگزین کی شائع کردہ یہ رپورٹ ہماری ویب کے قارئین کے لیے بھی پیشِ خدمت ہے-

تین بنیادی سوال
دراصل ملازمت کے لیے انٹرویو لینے والا ہر شخص تین بنیادی چیزیں جاننا چاہتا ہے۔ وہ تین چیزیں یہ ہیں: (1) آپ کو جس کام کے انجام دینے کے لیے ملازم رکھنا مقصود ہے، کیا آپ وہ کام انجام دینے کی مہارت اور تجربہ رکھتے ہیں؟
(2) آپ کو جس کام کے انجام دینے کے لیے ملازم رکھا جا رہا ہے، کیا آپ کو اس کام اور کمپنی سے دلچسپی ہے اور کیا آپ اس کے لیے پُرجوش ہیں؟
(3) کیا آپ پہلے سے کام کرنے والے ملازموں کے ساتھ ٹیم کے ایک رکن کی طرح مل کر کام کر سکیں گے اور کمپنی کی اقدار اور ماحول سے ہم آہنگ ہو سکیں گے؟
 

یہ بات اپنی جگہ درست کہ ملازمت کے لیے انٹرویو میں عموماً مذکورہ بالا تین بنیادی سوال پوچھے جاتے ہیں لیکن ملازمت کے لیے انٹرویو کے دوران انٹرویو لینے والا نہ صرف مختلف سوال پوچھ سکتا ہے بلکہ وہ مختلف زاویوں سے بھی سوال پوچھ سکتا ہے؟ وہ یہ جانچنے کے لیے بھی ایک سوال مختلف زاویوں سے پوچھ سکتا ہے کہ آپ اس سوال کا درست جواب واقعی جانتے ہیں یا نہیں۔

تین بنیادی سوالوں کی معنویت
1۔ آپ کو جس کام کے انجام دینے کے لیے ملازم رکھنا مقصود ہے، کیا آپ وہ کام انجام دینے کی مہارت اور تجربہ رکھتے ہیں؟
آپ نے جس ملازمت کے حصول کے لیے درخواست دی ہے، اس کے لیے درکار مہارتوں اور تجربے کے بارے میں سوچیے اور جائزہ لیجیے کہ آپ اس اعتبار سے کس درجے پر پورا اترتے ہیں۔ جائزہ لیجیے کہ آپ میں وہ تیکنیکی مہارتیں ہیں جن کا تقاضا ملازمت دینے والے نے کِیا ہے۔ اس کے علاوہ ملازمت کے لیے درکار عمومی مہارتوں میں شامل ہیں اپنے خیالات کے اظہار میں مہارت، انفارمیشن ٹیکنالوجی (آئی ٹی) میں مہارت، ٹیم کے رکن کی حیثیت سے کام انجام دینے میں مہارت وغیرہ۔ آپ اس سوال کا جواب دینے کی تیاری کر لیں گے تو آپ کو انٹرویو کے دوران پوچھے جانے والے کئی دوسرے سوالوں کے جواب دینے میں بھی آسانی ہو جائے گی اور اس عمل کے دوران آپ پٹری سے اتر کر غیرمتعلق معاملات و موضوعات پر بات بھی نہیں کریں گے۔ جب آپ کو اس قِسم کے خوف زدہ کر دینے والے (اور بعض اوقات احمقانہ) سوالوں کے جواب دینا پڑیں تو ہمیشہ کلیدی مہارتوں اور تجربے کی بنیاد پر ان کا جواب دیں۔ یعنی اپنے بارے میں بتایئے؟ آپ کی سب سے اہم خوبیاں اور خامیاں کون کون سی ہیں؟ آپ ہمارے لیے ایسا کیا کام انجام دے سکتے ہیں جو دوسرے امیدوار انجام نہیں دے سکتے؟ کیا آپ کا خیال ہے کہ آپ اس ملازمت کے لیے سب سے موزوں ہیں؟ آپ کا کیا خیال ہے اس ملازمت کے دوران بڑے چیلنج کون کون سے ہوں گے؟ وغیرہ وغیرہ۔