بھارتی کرکٹ ٹیم کے سابق کھلاڑی وریندر سہواگ نے 20 سال پہلے دورہ پاکستان کے دوران پاکستانیوں کی مہمان نوازی کی تعریف کرتے ہوئے جذباتی ہونے کے راز سے پردہ اٹھا دیا۔
وریندر سہواگ نے اپنے انٹرویو میں بتایا کہ ہم نے 2003ء میں پاکستان کا دورہ کیا تو پاکستانی عوام کی طرف سے بہت پیار ملا، ہمیں پاکستان میں ہر جگہ ایسا ہی پیار ملا جسے دیکھ کر ہم جذباتی ہوگئے۔
سہواگ کا کہنا تھا کہ لاہور میں خریداری کے لیے گئے تو مقامی بازار سے اپنے خاندان کے لیے 30 سے 35 پاکستانی سوٹ خریدے لیکن دکاندار نے مجھ سے یہ کہہ کر پیسے لینے سے انکار کر دیا کہ میں مہمان ہوں اور وہ اپنے ملک میں آئے مہمان سے پیسے نہیں لے سکتا۔
بھارتی کرکٹر نے کہا کہ پاکستان کے لوگوں کی تقسیم ہند سے قبل بھارت سے جُڑی یادیں سن کر ہماری آنکھوں میں آنسو آگئے تھے‘۔ پاکستان کے اس دورہ سے جڑی یادیں کبھی فراموش نہیں کرسکتے۔
وریندر سہواگ کا شمار بھارت کے نامور بلے بازوں میں ہوتا ہے، اپنی جارحانہ بیٹنگ کی وجہ سے شہرت پانے والے سہواگ انٹرنیشنل کرکٹ سے ریٹائر ہوچکے ہیں تاہم اپنے کیریئر کے دوران دورہ پاکستان کی یادیں آج بھی ان کے ذہن میں تازہ ہیں۔