پاکستان کرکٹ بورڈ نے تین ملکی سیریز اور آئی سی سی انڈر 19 ورلڈ کپ کے لیے پاکستان انڈر 19 ٹیم کا اعلان کر دیا ہے۔ فرحان یوسف بدستور پاکستان انڈر 19 ٹیم کی قیادت کریں گے جبکہ عثمان خان نائب کپتان ہوں گے۔
تین ملکی سیریز 25 دسمبر سے 6 جنوری تک زمبابوے میں کھیلی جائے گی جس میں پاکستان، افغانستان اور میزبان زمبابوے کی ٹیمیں شریک ہوں گی۔ سیریز کے تمام میچز 50 اوور فارمیٹ میں ہوں گے اور پاکستان انڈر 19 ٹیم کم از کم چار میچز کھیلے گی جبکہ فائنل 6 جنوری کو شیڈول ہے۔
اس کے بعد آئی سی سی انڈر 19 ورلڈ کپ 15 جنوری سے 6 فروری تک نمیبیا اور زمبابوے میں منعقد ہوگا جس میں دنیا بھر سے نوجوان ٹیمیں حصہ لیں گی۔ ورلڈ کپ بھی 50 اوور فارمیٹ میں کھیلا جائے گا۔
پاکستان انڈر 19 اسکواڈ میں ایک تبدیلی کی گئی ہے عمر زیب کو محمد حذیفہ کی جگہ ٹیم میں شامل کیا گیا ہے۔
اعلان کردہ پاکستان انڈر 19 اسکواڈ میں فرحان یوسف (کپتان)، عثمان خان (نائب کپتان)، عبدالسبحان، احمد حسین، علی حسن بلوچ، علی رضا، دانیال علی خان، حمزہ ظہور، حذیفہ احسن، عمر زیب، مومن قمر، محمد صیّام، محمد شایان، نقاب شفیق اور سمیر منہاس شامل ہیں۔