سفر کے دوران بچوں کو کنٹرول کرنا اکثر ماؤں کیلئے بہت مشکل کام ہوتا ہے اوراگر سفر جہاز کا ہو تو محدود سی جگہ پر بچوں کو قابو کرنا اور روتے بچوں کو خاموش کروانا بہت دشوار مرحلہ ہوتا ہے تاہم اداکارہ ایمن خان نے ماؤں کی مشکل کو آسان کرنے کا طریقہ بتادیا ہے۔
شوبز انڈسٹری کی مقبول اداکارہ ایمن خان نے ایک پوڈکاسٹ کے دوران بچوں کی پرورش سے متعلق گفتگو کرتے ہوئے جہاز میں بچوں کے ساتھ سفر کرنے والی ماؤں کو اہم مشورہ بھی دیا۔
ایمن خان نے جہاز میں سفر کے حوالے سے ماؤں کی رہنمائی کیلئے چند ٹپس بھی دیں۔ایمن خان نے کہا کہ میری بیٹی ’امل چار مہینے کی تھی ہم جب سے ہی جہازوں میں سفر کر رہے ہیں۔
انہوں نے کہا کہ بچے جہاز میں بہت روتے ہیں جس سے مائیں کافی پریشان ہوجاتی ہیں اور ماؤں کو سمجھ ہی نہیں آرہا ہوتا کہ یہ کیوں رو رہے ہیں۔دراصل جہاز میں ہوا کے دباؤ کی وجہ سے بچوں کے کان بند ہوجاتے ہیں، اس لیے بچوں کے کانوں میں شدید تکلیف ہوتی ہے۔
ایمن خان نے مسئلے کا حل پیش کرتے ہوئے کہا کہ ماؤں کو چاہئے کہ وہ سفر کے دوران بچوں کیلئے فیڈر یا پیسیفائر لازمی رکھیں، کیونکہ چوسنے سے کانوں پر دباؤ کم ہوتا ہے‘ اور بچے کے دھیان بٹ جاتا ہے جس سے رونا دھونا بھی بند ہوجاتا ہے۔