یشیا کپ ٹی20 کے فائنل میچ میں آج اتوار کو روایتی حریف پاکستان اور انڈیا مدمقابل ہیں۔
دبئی کرکٹ سٹیڈیم میں میچ کا آغاز پاکستانی وقت کے مطابق ساڑھے سات بجے ہو گا جبکہ ٹاس سات بجے شیڈول ہے۔
ایشیا کپ کی تاریخ میں پہلی مرتبہ انڈیا اور پاکستان فائنل میچ میں مدمقابل ہیں۔
رواں ایونٹ میں انڈیا ناقابل شکست ہے اور پاکستان کو بھی گروپ اور سپر فور مرحلے کے میچز میں شکست دے چکا ہے۔
دوسری جانب پاکستان نے گروپ میچز مرحلے میں متحدہ عرب امارات اور اومان کی ٹیموں کو ہرایا جبکہ سپر فور مرحلے میں سری لنکا اور بنگلہ دیش کو شکست دی۔
یاد رہے کہ اب تک انڈیا اور پاکستان کے درمیان 15 ٹی20 انٹرنیشنل میچز ہوچکے ہیں۔ دبئی میں کھیلا جانے والا آج کا میچ پاکستان اور انڈیا کے درمیان 16واں انٹرنیشنل ٹی20 میچ ہے۔
کُل 15 ٹی20 میچز میں سے 12 میں انڈیا نے کامیابی حاصل کی جبکہ تین میں گرین شرٹس نے فتح سمیٹی ہے۔اس سے اندازہ ہوتا ہے کہ انڈیا کا پلڑا کھیل کے مختصر ترین فارمیٹ میں پاکستان پر بہت زیادہ بھاری رہا ہے حالانکہ ون ڈے اور ٹیسٹ میچوں میں پاکستان کا پلڑا بھاری رہا ہے۔ای ایس پی این کرک انفو کے اعداد و شمار کے مطابق دونوں ٹیموں کے درمیان پہلا ٹی20 میچ 14 ستمبر 2007 کو ڈربن میں کھیلا گیا جو ٹائی ہوگیا تھا تاہم اسی برس 24 ستمبر کو جوہانسبرگ میں کھیلے گئے پہلے ٹی20 ورلڈ کپ کے فائنل میں انڈیا نے پاکستان کو پانچ رنز سے شکست دے کر ٹرافی اپنے نام کی تھی۔اس کے بعد سنہ 2012 میں دونوں ٹیمیں تین مرتبہ آمنے سامنے آئیں۔ کولمبو میں انڈیا نے آٹھ وکٹوں سے کامیابی حاصل کی جبکہ 25 دسمبر کو بینگلور میں پاکستان نے تاریخی جیت اپنے نام کرتے ہوئے انڈیا کو پانچ وکٹوں سے شکست دی۔اسی برس احمد آباد میں 28 دسمبر کو انڈیا نے جواب میں 11 رنز سے فتح حاصل کی۔سنہ 2014 کے ٹی20 ورلڈ کپ میں بنگلہ دیش کے شہر میرپور میں انڈیا نے پاکستان کو سات وکٹوں سے مات دی جبکہ سنہ 2016 میں دونوں ٹیموں کے درمیان دو مقابلے ہوئے۔پہلا مقابلہ میرپور میں ہوا جہاں انڈیا نے پاکستان سے پانچ وکٹوں کی برتری سے کامیابی حاصل کی اور دوسرا مقابلہ ایڈن گارڈنز کولکتہ میں ہوا جہاں میزبان انڈیا چھ وکٹوں کی برتری سے فاتح بنا۔سنہ 2021 میں دبئی کے میدان پر پاکستان نے تاریخ رقم کی اور پہلی بار انڈیا کو 10 وکٹوں سے شکست دی۔اس سے آئندہ برس یعنی سنہ 2022 میں دونوں ٹیموں کے درمیان مسلسل تین میچز کھیلے گئے، جن میں انڈیا نے پہلا میچ پانچ وکٹوں سے جیتا جبکہ پاکستان نے دوسرے میچ میں انڈیا کو پانچ وکٹوں سے شکست دی۔اسی برس میلبورن میں کھیلے گئے ورلڈ کپ میچ میں انڈیا نے سنسنی خیز مقابلے کے بعد چار وکٹوں سے فتح حاصل کی۔جون 2024 میں نیویارک میں انڈیا نے پاکستان کو چھ رنز سے ہرایا جبکہ رواں ٹی20 ایشیا کپ میں دبئی میں دونوں ٹیمیں دو بار آمنے سامنے آئیں جہاں انڈیا نے پاکستان کو دونوں میچز میں شکست دی۔