کولمبو کے پریماداسا سٹیڈیم میں کھیلے گئے میچ میں پاکستان ویمنز کرکٹ ٹیم انڈیا کے 248 رنز کے ہدف کے تعاقب میں 159 رنز بنا کر آل آؤٹ ہو گئی اور 88 رنز کی شکست سے دوچار ہوئی۔
پاکستان اور انڈیا کی خواتین کی کرکٹ ٹیموں کے درمیان آئی سی سی ویمنز کرکٹ ورلڈ کپ کا اتوار کے روز کھیلے جانے والا میچ انڈیا ویمنز نے 88 رنز سے جیت لیا ہے۔
ویمنز ورلڈ کپ 2025 کے آج کے گروپ میچ میں انڈین ٹیم نے پہلے بیٹنگ کرتے ہوئے پاکستان کو 248 رنز کا ہدف دیا تھا تاہم جواب میں پاکستانی ٹیم 43 اوورز میں 159 رنز پر آؤٹ ہوگئی۔
پاکستانی پلیئر سدرہ امین نے81 رنز بنائے۔ نتالیہ پرویز 33 رنز بنا کر نمایاں رہیں۔ تاہم پاکستان ٹیم کی دیگر بیٹرز خاطر خواہ کارکردگی دکھانے میں ناکام رہیں۔ سدرہ اقبال اور رامین شمیم کوئی رنز بنائے بغیر صفر کے سکور پر آؤٹ ہوئیں۔
دوسری جانب انڈیا کی جانب سے دیپتی شرما اور کرانتی نے تین تین وکٹیں حاصل کیں۔ انڈین کھلاڑی ہرلین دیول نے 46 رنز بنائے، رچا گھوش نے 35 جبکہ جمائما نے 32 رنز بنائے جبکہ ثنے رانا نےدو کھلاڑیوں کو آؤٹ کیا۔
یاد رہے کہ پاکستان ٹیم نے ٹاس جیت کر پہلے فیلڈنگ کا فیصلہ کیا تھا۔ کولمبو کے پریماداسا سٹیڈیم میں کھیلا جانے والا ویمنز ورلڈ کپ کا آج کا چھٹا میچ تھا۔
تناؤ اور متنازع واقعات کا رنگ اب دونوں ملکوں کی خواتین ٹیموں کے درمیان میچز میں بھی نظر آیا جب ٹاس کے دوران بھی دونوں ٹیموں کی کپتانوں نے ایک دوسرے سے ہاتھ نہیں ملایا۔
دونوں کپتانوں نے میزبان سے میچ سے متعلق بات کی اور اس دوران انڈین کپتان ہرمن پریت کور پاکستانی کپتان سے ہاتھ ملائے بغیر وہاں سے چلی گئیں۔
یاد رہے کہ مینز ایشیا کپ کے دوران بھی نہ صرف انڈین کھلاڑیوں نے پاکستانی ٹیم سے ہاتھ نہیں ملایا تھا بلکہ فائنل جیتنے کے بعد پاکستان کرکٹ بورڈ کے چیئرمین محسن نقوی سی ٹرافی لینے سے بھی انکار کر دیا تھا۔
کیڑوں کی بہتات میں میچ کا بار بار رکنا
پاکستان اور انڈیا کے درمیان کھیلے گئے میچز میں کئی ایسے واقعات ہوئے جو کرکٹ کے گراؤنڈ پر پہلی بار دیکھے گئے تھے۔
اتوار کے روز کولمبو میں کھیلے جانے والے میچ کے دوران گراؤنڈ میں اڑنے والے کیڑے مکوڑوں کی بھرمار نے کھلاڑیوں کو پریشان کیے رکھا۔
آئی سی سی ویمنز کرکٹ ورلڈ کپ میں پاکستان اور انڈیا کی ویمنز ٹیموں کے میچ کے دوران کیڑے مکوڑوں نے کھلاڑیوں کو پریشان کردیا جبکہ اس دوران بار بار میچ بھی روکنا پڑا۔
کولمبو کے پریماداسا سٹیڈیم میں جاری ویمنز ورلڈ کپ میں پاکستان اور انڈیا کے درمیان میچ میں بیٹنگ کے دوران خواتین کھلاڑی بار بار مچھر بھگاتی نظرآئیں۔
کئی بار خلل آنے کے بعد میچ کے 34ویں اوور کے اختتام پر 15 منٹ کےلیے روک دیا گیا جس دوران منتظمین نے کھلاڑیوں کی شکایت کے نتیجے میں گراؤنڈ میں مچھر مار سپرے کروایا۔
پاکستان ٹیم کی کپتان فاطمہ ثنا کی ایسی کئی تصاویر سوشل میڈیا پر وائرل ہیں جس میں وہ ہوا میں سپرے کرکے مچھر بھگانے کی کوشش کرتے نظر آ رہی ہیں۔
میچ کے دوران کیڑوں نے کھلاڑیوں کو پریشان کیے رکھارن آؤٹ کا تنازع
اتوار کے روز میچ میں پاکستان کی اننگز کے شروع میں ہی تنازع سامنے آیا جب اوپنر منیبہ علی متنازع طور پر رن آؤٹ ہو گئیں۔
لیفٹ ہینڈڈ کھلاڑی پاکستانی اوپنر منیبہ انڈیا کی بولنگ کے خلاف جدوجہد کرتی نظر آ رہی تھیں جب ہی اننگز کے چوتھے اوور میں منیبہ علی اپنی کریز سے باہر کھیل رہی تھیں اس دوران انڈین بولر کرانتی کی گیند پر ایل بی ڈبلیو کی اپیل کی گئی۔
آؤٹ کی اپیل پر منیبہ علی کو تھرڈ امپائر نے پہلے ناٹ آؤٹ قرار دیا۔
سکرین پر ری پلے میں دکھایا گیا کہ منیبہ نے گیند آنے سے پہلے ہی اپنا بیٹ گراؤنڈ کر لیا تھا اور تھرڈ امپائر کیرن کلاسے کا ’ناٹ آؤٹ‘ کا فیصلہ گراؤنڈ میں بڑی سکرین پر بھی چلا گیا۔ تاہم پھر انھیں اچانک آؤٹ قرار دے دیا۔
اس رن آؤٹ پر کمنٹیٹر اور میدان میں موجود شائقین سب حیران نظر آئے۔ تھرڈ امپائر کے فیصلے پر منیبہ علی اور ٹیم مینجمنٹ ناخوش ہوئے اور ناراضی کا اظہار کیا۔
واضح رہے کہ منیبہ علی کریز میں تھیں لیکن جس وقت بال سٹمپس پر لگی تو بیٹ ہوا میں تھا۔ تاہم اس فیصلے پر پاکستانی کپتان باؤنڈری لائن پر امپائر سے کافی دیر بچث کرتی بھی نظر آئیں جب کہ سوشل میڈیا پر بھی شائقین کے دوران بحث چھڑ گئی۔
ہیڈ یا ٹیل، ٹاس میں الجھن
گو کہ یہ واضح ہے کہ غالباً ٹاس سے ہی اس کھیل میں ہار جیت کا فیصلہ نہیں ہو جانا تھا تاہم،’ کوئی بھی یہ اندازہ نہیں لگا سکتا تھا کہ ثنا غلط کال کریں گی اور پھر بھی ٹاس جیت جائیں گی۔
دونوں ملکوں کے درمیان سیاسی تناؤ کے پس منظر میں، کپتان ثنا اور ہرمن پریت کور کا مصافحہ نہ کرنا کوئی تعجب کی بات نہیں تھی خاص طور پر مردوں کی ٹیموں کے درمیان حالیہ میچوں میں قائم ہونے والی مثال سے یہ واضح تھا۔
پاکستان کے کپتان نے ٹاس کے وقت ٹیل منتحب کیا جب ہرمن پریت نے سکہ چلایا لیکن میچ ریفری شاندرے فرٹز نے غالبا غلط سنا اور اعلان کیا کہ ’ہیڈز‘ کی کال ہے۔
براڈ کاسٹر اور آسٹریلیا کے سابق بلے باز میل جونز ٹاس کر رہے تھے جب فرٹز کے الفاظ دہرائے گئے۔ سکہ اچھالا گیا اور اعلان کیا گیا کہ پاکستان نے ٹاس جیت لیا ہے۔
کسی بھی کپتان نے اس پر سوال نہیں اٹھایا یوں ثنا آگے بڑھیں اور اس بات کی تصدیق کی کہ پاکستان پہلے بولنگ کرے گا۔
اس ایک معصومانہ غلطی کے باوجود انڈیا کو نقصان نہیں پہنچا اور آخر میں بہرحال وہ جیت گیا۔
میچ سے قبل پریس کانفرنس میں ایک انڈین صحافی نے پاکستانی کپتان فاطمہ ثنا کو یاد دلایا کہ بسمہ معروف کی بیٹی کے ساتھ انڈین کھلاڑیوں نے تصاویر بنوائی تھیں اور دونوں ٹیموں کے اُن مناظر کو بہت پذیرائی ملی تھی۔ لیکن اب سب کچھ بدل گیا ہے۔ اس پر آپ کیا کہیں گی؟
اس پر فاطمہ ثنا کا کہنا تھا کہ ’جس طرح سب بسمہ باجی سے مل رہے تھے اور اُن کی بیٹی کو پیار دے رہے تھے، ایسا دیکھنا بہت اچھا لگتا ہے۔ لیکن پہلی چیز یہ ہے کہ آپ جس چیز کے لیے یہاں آئے ہیں، اس پر فوکس کریں۔‘
اُن کا کہنا تھا کہ ہمارے ہر ٹیم کے ساتھ اچھے تعلقات ہیں اور جو بھی چیز سپیرٹ آف دی گیم میں آئے گی، ہم اس کے مطابق چلیں گے۔
واضح رہے کہ سنہ 2022 میں نیوزی لینڈ میں ہونے والے ویمنز کرکٹ ورلڈ کے میچ کے بعد انڈین کھلاڑیوں نے پاکستانی کپتان بسمہ معروف کی چھ ماہ کی بیٹی کے ساتھ تصاویر بنوائیں تھیں۔ بعض انڈین کھلاڑیوں نے بچی کو گود میں اُٹھا لیا تھا۔
یہ تصاویر وائرل ہوئی تھیں اور دونوں ممالک میں اسے سراہا گیا تھا۔ انڈیا نے پاکستان کو اس میچ میں 107 رنز سے شکست دے دی تھی۔
واضح رہے کہ انڈیا اور پاکستان کی ویمنز ٹیموں کے درمیان میچ پر تبصرہ کرتے ہوئے انڈین کپتان سوریا کمار یادیو نے ایک بار پھر کہا تھا کہ کہ دونوں ملکوں کے درمیان روایتی حریفانہ کوئی مقابلہ نہیں ہے۔
سٹار سپورٹس کے پروگرام میں گفتگو کرتے ہوئے انڈین کپتان کا کہنا تھا کہ ویمنز ٹیم گذشتہ چند برسوں کے درمیان مختلف طرز کی کرکٹ کھیل رہی ہے۔
سوریا کمار یادیو کا کہنا تھا کہ ویمن ٹیموں کے درمیان بھی 'رائیولری' والی کوئی بات نہیں ہے اور اگر انڈین ٹیم اپنی صلاحیت کے مطابق کھیلی تو وہ پاکستان کو آسانی سے شکست دے سکتی ہے۔
انڈیا نے ایشیا کپ میں گروپ میچ، پھر سپر فور اور بعدازاں فائنل میں بھی شکست دے کر ٹائٹل اپنے نام کر لیا تھا۔
انڈین کپتان کا کہنا تھا کہ جب وہ فائنل میں جلدی آؤٹ ہو کر پویلین لوٹے تو اُن کے دل کی دھڑکن قابو میں نہیں تھی۔
اُن کا کہنا تھا کہ جب تک رنکو سنگھ نے وننگ شاٹ نہیں کھیلا، اس وقت تک اُن کے دل کی دھڑکن قابو میں نہیں تھی۔
’یہ کھیل کی روح کے خلاف ہے‘
مینز کی طرح ویمنز ٹیموں کے درمیان بھی ہینڈ شیک نہ ہونے کا معاملہ سوشل میڈیا پر موضوع بحث رہا۔
فرید خان نامی صارف لکھتے ہیں کہ یہ کھیل کی روح کے خلاف ہے، پاکستان کو یہ میچ جیت کر اس کا جواب دینا چاہیے۔
عبداللہ نامی صارف لکھتے ہیں کہ ایک اور دن جب ’جینٹلمین گیم‘ سیاست کی نذر ہو گئی۔
پاکستان کی ٹیم ایونٹ کا اپنا دوسرا میچ کھیل رہی ہے، پہلے میچ میں اسی بنگلہ دیش کے ہاتھوں شکست کا سامنا کرنا پڑا تھا۔
