پاکستان نے پہلی ٹیسٹ سیریز کے پہلے ٹیسٹ میچ میں جنوبی افریقہ کو 93 رنز سے شکست دے کر سیریز میں ایک صفر کی برتری حاصل کر لی ہے۔
لاہور کے قذافی سٹیڈیم میں ہونے والے میچ کے چوتھے روز پاکستان کی پوزیشن آغاز میں اس وقت مستحکم ہو گئی جب مہمان کھلاڑی یکے بعد دیگرے آؤٹ ہو گئے۔
جنوبی افریقہ نے دو وکٹوں کے نقصان پر 51 رنز پر اپنی اننگز کا دوبارہ آغاز کیا لیکن مجموعی سکور میں صرف چار رنز کے اضافے پر مزید دو وکٹیں گنوا دیں۔
مزید پڑھیں
اس کے بعد بریوس نے اننگز کو تھوڑا سہارا دیا تاہم وہ 54 رنز پر نعمان علی کی گیند پر بولڈ ہو کر پویلین لوٹے تو اس کے بعد آنے والے بلے باز زیادہ دیر تک کریز پر رک نہیں سکے۔
پاکستان کی جانب سے نعمان علی اور شاہین شاہ آفریدی نے چار، چار اور ساجد خان نے دو وکٹیں حاصل کیں۔
تیسرے روز پاکستان نے جنوبی افریقہ کو چوتھی اننگز میں 277 رنز کا ہدف دیا تھا۔
اس سے قبل منگل کو پاکستان کی پوری ٹیم اپنی دوسری اننگز میں صرف 167 رنز بنا کر آؤٹ ہوگئی تھی تاہم پاکستان کو اپنی پہلی 276 رنز کی برتری حاصل تھی۔
پاکستان کی جانب سے بابر اعظم 42 رنز کے ساتھ ٹاپ سکورر رہے، عبداللہ شفیق 41 اور سعود شکیل 38 رنز کے ساتھ نمایاں رہے۔ ان کے علاوہ کوئی بھی بلے باز قابل ذکر کارکردگی نہ دکھا سکا۔
جنوبی افریقہ کی جانب سے سینورن متھوسمی نے پانچ، سائمن ہارمر نے پانچ اور ربادہ نے ایک وکٹ حاصل کی۔
پہلی اننگز میں جنوبی افریقہ کی پوری ٹیم 269 رنز پر آؤٹ ہوئی، جس پر پاکستان کو 109 رنز کی برتری حاصل ہوئی تھی۔
لاہور کے قذافی سٹیڈیم میں ہونے والے میچ میں اس سے قبل پاکستان نے اپنی اننگز میں 378 رنز بنائے تھے۔
اتوار کو شروع ہونے والے اس میچ کا ٹاس جیت کر پاکستان نے پہلے بیٹنگ کا فیصلہ کیا تھا۔