پاکستان اور جنوبی افریقا کے درمیان جاری دوسرے ٹیسٹ کے تیسرے دن جنوبی افریقا کے فاسٹ بولر کگیسو رباڈا نے غیر معمولی بیٹنگ کا مظاہرہ کرتے ہوئے نصف سنچری اسکور کی۔ وہ اپنے ملک کی جانب سے تیسرے نمبر کے کھلاڑی بن گئے جنہوں نے گیارہویں نمبر پر بیٹنگ کرتے ہوئے پچاس رنز کی اننگز کھیلی۔
رباڈا نے جارحانہ انداز اپناتے ہوئے 50 رنز مکمل کیے جس میں چار چھکے اور تین چوکے شامل تھے۔ انہوں نے سنیران متو سامی کے ساتھ مل کر آخری وکٹ پر 86 رنز کی شراکت قائم کی، جس سے جنوبی افریقہ نے پاکستان پر برتری حاصل کر لی۔
اس سے قبل جنوبی افریقا ایک وقت میں سات وکٹوں پر 210 رنز پر محدود تھا مگر آخری تین وکٹوں نے 183 رنز کا قیمتی اضافہ کیا۔
پاکستان کی جانب سے نوجوان اسپنر آصف آفریدی نے شاندار بولنگ کرتے ہوئے متعدد وکٹیں حاصل کیں اور حریف بیٹنگ لائن کو ابتدا میں مشکلات میں ڈال دیا۔