راولپنڈی پولیس نے شہری پر تشدد کی وائرل ویڈیو سامنے آنے کے بعد جعلی پیر خرم علی خان عرف پیر لٹکن شاہ کو گرفتار کر لیا۔ ملزم کے خلاف تھانہ وارث خان میں مقدمہ درج کر دیا گیا ہے اور تفتیش جاری ہے۔
دو روز قبل ایک ویڈیو سوشل میڈیا پر وائرل ہوئی تھی جس میں ملزم نے اپنے آستانہ وارث خان میں ایک شہری کو زمین پر لٹا کر تشدد کیا اور نام نہاد روحانی دعوؤں کی آڑ میں گالی گلوچ کی۔ ویڈیو کے وائرل ہونے پر سی پی او راولپنڈی سید شہزاد ندیم بخاری نے معاملے کا نوٹس لیا اور ایس پی راول سمیت متعلقہ افسران کو کارروائی کی ہدایت دی۔
ایس ایچ او وارث خان انسپکٹر خضر حیات نے ٹیم کے ہمراہ کارروائی کرتے ہوئے ملزم کو گرفتار کر کے تھانے منتقل کر دیا۔ پولیس کے مطابق ملزم کو جلد عدالت میں پیش کر کے جسمانی ریمانڈ حاصل کیا جائے گا۔
ذرائع کے مطابق خرم علی خان اس سے قبل بھی ایک مقدمے میں نازیبا حرکات کے الزام پر اڈیالہ جیل جا چکا ہے۔ اس کے مختلف سوشل میڈیا پیجز پر جعلی روحانی دعوے اور ڈرامائی ویڈیوز کے ذریعے شہریوں کو گمراہ کرنے کے شواہد بھی سامنے آئے ہیں۔