نواں کلی میں ڈرگ ٹاسک فورس اور ایف آئی اے نے مشترکہ کارروائی کرتے ہوئے جعلی ادویہ کی پیکنگ فیکٹری پر چھاپہ مار کر فیکٹری مالک سمیت 6 افراد کو گرفتار کرلیا گیا۔
گرفتار ملزمان میں فیکٹری مالک محمد طاہر کے علاوہ اس کے ملازمین نذیر، عبداللہ، محمد یوسف، محمد جاوید اور عزیزالرحمٰن شامل ہیں۔
مذکورہ فیکٹری مغل آباد شاکر کالونی میں ایک رہائشی مکان میں قائم تھی جہاں جعلی، غیر قانونی اور غیر رجسٹرڈ ادویہ تیار اور پیک کی جاتی تھیں۔ جعلی ادویہ اندرون ملک اور پڑوسی ممالک کو سپلائی کی جاتی تھیں۔
چھاپے کی سربراہی ڈرگ انسپکٹر علی احمد اچکزئی اور ایف آئی اے کے افسر نے کی۔ کارروائی کے دوران لاکھوں روپے مالیت کی جعلی ادویہ، کیپسول، اسٹریپس اور خام مال قبضے میں لے کر فیکٹری کو سیل کر دیا گیا۔
ادویہ کے نمونے ڈرگ ٹیسٹنگ لیبارٹری بھجوادیے گئے ہیں اور رپورٹ موصول ہونے پر ملزمان کے خلاف ڈرگ کورٹ میں مقدمہ درج کیا جائے گا۔
ذرائع کے مطابق ابتدائی تفتیش میں ملزمان نے انکشاف کیا کہ وہ کوئٹہ کے بڑے میڈیکل اسٹورز کو بھی جعلی ادویہ سپلائی کرتے رہے ہیں، جن کے خلاف جلد کریک ڈاؤن کیا جائے گا۔