اینٹی نارکوٹکس فورس نے تعلیمی اداروں کے اطراف اور مختلف شہروں میں منشیات فروشی اور اسمگلنگ کے خلاف کریک ڈاؤن کرتے ہوئے 10 کارروائیوں میں 2296.3 کلوگرام منشیات برآمد کرلی جبکہ 5 ملزمان کو گرفتار کرلیا۔ برآمد کی گئی منشیات کی مالیت 20 کروڑ 82 لاکھ روپے سے زائد بتائی جارہی ہے۔
اے این ایف نے نوجوانوں کو منشیات سے بچانے کے لیے تعلیمی اداروں کے اطراف خصوصی آپریشن کرتے ہوئے گلگت میں دیامر کالونی جٹیال روڈ کے قریب ملزم سے 500 گرام چرس برآمد کی، اسلام آباد کے کاک پل کے نزدیک موٹر سائیکل سوار سے 70 گرام چرس برآمد کی، گجرات جی ٹی روڈ پر یونیورسٹی کے قریب موٹر سائیکل سوار سے 60 گرام ویڈ برآمد کی۔ گرفتار ملزمان نے طلبا کو منشیات فروخت کرنے کا اعتراف کیا۔
اے این ایف نے راولپنڈی، کراچی، گجرات، گوادر اور پشین میں بھی اہم کارروائیاں کیں جن میں بڑی مقدار میں منشیات ضبط کی گئیں۔
راولپنڈی کوریئر آفس میں امریکا سے آئے پارسل سے 52 گرام ویڈ برآمد کی گئی۔تھائی لینڈ سے آئے دوسرے پارسل سے 22 گرام ویڈ برآمد کی گئی۔ کورنگی کراچی میں برطانیہ جانے والے پارسل سے 21 گرام چرس نکالی گئی۔ گجرات ٹول پلازہ کے قریب گاڑی سے 33.6 کلوگرام چرس برآمد کرکے دو ملزمان کو گرفتار کیا گیا۔ گوادر کے پمپ بازار سے پلاسٹک ٹینک میں چھپائی گئی 71 کلوگرام آئس، 13 کلوگرام ہیروئن، 10 کلوگرام چرس برآمد کی گئی۔ پشین کے علاقے حمید کراس سرنان کے قریب اے این ایف نے 2160 کلوگرام گردہ چرس قبضے میں لے لی جبکہ نگور شریف، ضلع گوادر سے 8 کلوگرام ویڈ بھی پکڑا گیا۔
تمام کارروائیاں مکمل کرنے کے بعد انسدادِ منشیات ایکٹ 1997 کے تحت مقدمات درج کر کے مزید تحقیقات شروع کردی گئی ہیں۔
ترجمان نے مؤقف اختیار کیا کہ منشیات فروشوں کے خلاف زیرو ٹالرنس پالیسی جاری ہے اور نوجوان نسل کو منشیات کے زہر سے بچانے کے لیے آپریشن مزید تیز کیے جائیں گے۔