بنوں کے احمد زئی وزیر پولیس اسٹیشن پر دہشتگردوں نے چاروں اطراف سے ہلکے اور بھاری ہتھیاروں سے حملہ کردیا، تاہم پولیس جوانوں نے بھرپور مزاحمت کرتے ہوئے حملہ ناکام بنا دیا۔
ضلع بنوں میں حالیہ دنوں دہشت گردی کے واقعات میں اضافہ دیکھا جا رہا ہے، جس کے باعث مختلف علاقوں کے لوگ نقل مکانی پر مجبور ہیں۔
حملے کی اطلاع کے بعد تھانہ ڈومیل، تھانہ ٹان کی نفری اور سیکیورٹی فورسز بھی فوری طور پر موقع پر پہنچیں اور مشترکہ کارروائی کرتے ہوئے دہشت گردوں کے خلاف شدید جوابی فائرنگ کی۔ پولیس کے مطابق جوابی کارروائی میں شرپسندوں کو بھاری جانی نقصان پہنچنے کی اطلاعات ہیں۔
واقعے میں پولیس کے پانچ اہلکار معمولی زخمی ہوئے جن میں سپاہی احسان، سپاہی انور، سپاہی عرفات، سپاہی قدرت اور سپاہی انور خان شامل ہیں۔ زخمی اہلکاروں کو فوری طبی امداد فراہم کردی گئی ہے۔