اسلام آباد میں گزشتہ روز ڈیوٹی پر جاتے ہوئے شہید کیے گئے اے ایس آئی اکبر علی خان کے بہیمانہ قتل کی گتھی سلجھ گئی۔ سی آئی اے اسلام آباد نے کارروائی کرتے ہوئے مقتول کے سالوں کو گرفتار کرلیا جو اس اندوہناک واردات میں ملوث تھے۔
تحقیقاتی ذرائع کے مطابق شہید اکبر علی خان کے سالے افغان شہری ہیں۔ ابتدائی تفتیش میں یہ بات سامنے آئی ہے کہ ملزمان نے مقتول کو اُس وقت فائرنگ کا نشانہ بنایا جب وہ اپنے فرض کی ادائیگی کے لیے گھر سے روانہ ہو رہے تھے۔
قتل کی وجہ عناد کیا تھی؟
ذرائع کے مطابق حکومت کی جانب سے افغان شہریوں کی واپسی کے فیصلے پر ملزمان نے اپنے بہنوئی سے مطالبہ کیا کہ وہ انہیں پناہ دے۔ شہید اہلکار نے قانون کی پابندی کرتے ہوئے غیر قانونی مطالبہ ماننے سے انکار کر دیا، جس پر ملزمان نے شدید رنجش کا اظہار کیا اور بدلے کی کارروائی کے طور پر قتل کی منصوبہ بندی کی۔
تفتیش میں یہ بھی انکشاف ہوا کہ ملزمان اپنی بہن کو ساتھ رکھ کر نہ پاکستان چھوڑ سکتے تھے اور نہ چھوڑ کر جا سکتے تھے، اسی الجھن میں انہوں نے انتہائی سنگین قدم اٹھاتے ہوئے بہنوئی کو قتل کرکے پیسے لے کر افغانستان فرار ہونے کا منصوبہ بنایا۔
تاہم سی آئی اے کی پیشہ ورانہ تحقیقات قاتلوں تک جا پہنچیں اور گزشتہ رات دونوں سالوں کو گرفتار کرکے حوالات منتقل کر دیا گیا۔ ملزمان سے مزید پوچھ گچھ جاری ہے۔
پولیس حکام کا کہنا ہے کہ اے ایس آئی اکبر علی خان نے فرض شناسی اور ایمانداری کی مثال قائم کی، جبکہ قاتلوں کو قانون کے مطابق سخت ترین سزا دلوانے کے لیے تمام شواہد مکمل کیے جا رہے ہیں۔
شہریوں اور شہید کے اہلِ خانہ نے ملزمان کی گرفتاری پر اسلام آباد پولیس اور سی آئی اے کی ٹیم کو خراجِ تحسین پیش کیا ہے۔