پرتگالی فٹبالر اور سعودی کلب النصر کے اسٹار کھلاڑی کرسٹیانو رونالڈو ایک بار پھر اپنے انسان دوست اور شفقت بھرے انداز کی وجہ سے سوشل میڈیا پر چھا گئے۔
حالیہ ویڈیو جسے النصر کے آفیشل ایکس اکاؤنٹ نے بھی ری پوسٹ کیا ہے میں دیکھا جاسکتا ہے کہ میچ سے قبل ٹیم لائن اپ کے دوران رونالڈو اپنے سامنے کھڑی ایک کمسن بچی کے گلے میں محبت بھرے انداز سے اپنا مفلر ڈال رہے ہیں۔ اس اچانک اور پیار بھرے انداز پر بچی کے چہرے پر حیرت اور خوشی کے واضح تاثرات دیکھے جاسکتے ہیں۔
ویڈیو نے دیکھتے ہی دیکھتے سوشل میڈیا پر دھوم مچا دی اور صارفین نے رونالڈو کے اس انسانی جذبے کو بھرپور سراہا۔
واضح رہے کہ چند روز قبل رونالڈو کا ایک شاندار اوور ہیڈ بائسائیکل کک گول بھی وائرل ہوا تھا جو انہوں نے 96ویں منٹ میں کیا تھا۔ 40 سالہ فٹبالر کی اس بے مثال فٹنس اور مہارت پر شائقین نے حیرت کا اظہار کیا، جبکہ یہ گول ان کے کیریئر کا 954واں گول تھا، جسے موجودہ سیزن کے بہترین گولز میں شمار کیا جا رہا ہے۔