وزیرِ دفاع خواجہ آصف نے کہا ہے کہ بانی تحریک انصاف کی بہن کا بھارتی میڈیا کو دیا گیا انٹرویو موجودہ صورتحال میں تابوت میں آخری کیل کے مترادف ہے۔ ان کا کہنا تھا کہ سابق وزیراعظم نواز شریف نے کبھی بھی بھارتی میڈیا کو پاکستان کے خلاف کوئی مؤقف نہیں دیا۔
خواجہ آصف نے اپنے بیان میں کہا کہ محترمہ بینظیر بھٹو کو شہید کیا گیا لیکن پاکستان پیپلز پارٹی نے کبھی بھارت سے رجوع نہیں کیا جبکہ تحریک انصاف نے دہشت گردی کے خلاف جنگ کی ہمیشہ مخالفت کی۔
وزیرِ دفاع نے مزید کہا کہ بانیٔ پی ٹی آئی نے کبھی سیاستدانوں سے مذاکرات کی کوشش نہیں کی اور خیبرپختونخوا کے وزیراعلیٰ بھی دہشت گردی کے خلاف جنگ میں سنجیدہ نظر نہیں آتے۔
انہوں نے کہا کہ ایسا بیانیہ اختیار کرنا جو ملکی سلامتی کے لیے نقصان دہ ہو کسی صورت قابل قبول نہیں۔