ایبٹ آباد میں لیڈی ڈاکٹر کے اغوا کے الزام میں پولیس نے قریبی سہیلی اور اس کے شوہر کو گرفتار کرلیا۔ واقعے کی ابتدائی رپورٹ تھانہ کینٹ میں درج کی گئی ہے۔
ایبٹ آباد ڈی ایچ کیو اسپتال میں تعینات ڈاکٹر وردہ، ڈیوٹی ختم کرنے کے بعد گھر روانہ ہورہی تھیں کہ جمعرات کی شام تھانہ کینٹ کی حدود سے اسے اغوا کرلیا گیا۔ ڈاکٹر وردہ کے والد مشتاق ولد انور کے مطابق، ان کی بیٹی اپنی سہیلی زوجہ وحید سے 67 تولے سونا واپس لینے گئی تھیں جو اس نے بطور امانت رکھا تھا، اور اسی دوران لاپتا ہو گئی۔
الزام پر نامزد ہونے والی زوجہ وحید کے شوہر تاجر رہنما وحید نے کہا کہ ان کی اہلیہ اور ڈاکٹر وردہ کی آپس میں گہری دوستی تھی اور وہ اس واقعے میں ملوث نہیں ہیں۔
ذرائع کے مطابق ایبٹ آباد پولیس نے والد کی رپورٹ پر خاتون اور اس کے خاوند کو حراست میں لے کر تفتیش شروع کردی ہے۔