نیشنل سائبر کرائم انویسٹی گیشن ایجنسی نے نوشہرہ کے علاقے پبی جبہ خٹک میں بڑی کارروائی کرتے ہوئے بچوں کے خلاف فحش اور جنسی استحصال سے متعلق مواد پھیلانے میں ملوث ملزم کو گرفتار کر لیا۔ یہ کارروائی نیشنل سینٹر فار مسنگ اینڈ ایکسپلوائٹڈ چلڈرن کی جانب سے موصول ہونے والی کامیاب سائبر ٹِپ پر کی گئی۔
ذرائع کے مطابق گرفتار ملزم سوشل میڈیا اور دیگر آن لائن پلیٹ فارمز پر بچوں کے جنسی استحصال سے متعلق مواد اپ لوڈ اور شیئر کرتا تھا۔ کارروائی کے دوران ملزم کے قبضے سے موبائل فون اور سمز برآمد کی گئیں، جن کے فرانزک تجزیے میں سنگین شواہد سامنے آئے ہیں۔
حکام کا کہنا ہے کہ ملزم کے موبائل فون سے بچوں کے خلاف جنسی ہراسگی سے متعلق مواد بھی برآمد ہوا ہے۔ملزم کے خلاف پیکا ایکٹ 2016 کی دفعہ 22 کے تحت مقدمہ درج کر لیا گیا ہے جبکہ مزید تفتیش جاری ہے۔ حکام کے مطابق ملزم کو جسمانی ریمانڈ کے لیے آج عدالت میں پیش کیا جائے گا۔