اسلام آباد میں منعقدہ میوزیکل نائٹ پروگرام کے دوران ٹارگٹ کلنگ کا واقعہ پیش آیا۔ فائرنگ کے نتیجے میں ایک نوجوان شدید زخمی ہوا جو دورانِ علاج دم توڑ گیا، جبکہ ڈیوٹی پر موجود پولیس اہلکار بھی زخمی ہوگیا۔
پولیس ذرائع کے مطابق فائرنگ کے واقعے میں زخمی ہونے والے نوجوان کی شناخت سمیع اللہ کے نام سے ہوئی ہے، جسے فوری طور پر اسپتال منتقل کیا گیا، تاہم وہ جانبر نہ ہوسکا۔ واقعے کے دوران ڈیوٹی پر مامور پولیس اہلکار غلام حسین بھی فائرنگ کی زد میں آ کر زخمی ہوگیا، جسے طبی امداد کے لیے اسپتال منتقل کردیا گیا ہے۔
واقعے کے بعد پولیس نے علاقے کو گھیرے میں لے کر شواہد اکٹھے کرلیے ہیں جبکہ حملہ آوروں کی تلاش کے لیے تحقیقات کا آغاز کر دیا گیا ہے۔ پولیس کا کہنا ہے کہ واقعے کی نوعیت اور محرکات جاننے کے لیے مختلف پہلوؤں سے تفتیش کی جا رہی ہے۔