ایف آئی اے امیگریشن نے اسلام آباد انٹرنیشنل ایئرپورٹ پر کارروائی کرتے ہوئے جعلی سفری دستاویزات پر بیرونِ ملک جانے والے چار مسافروں کو آف لوڈ کر دیا۔
آف لوڈ ہونے والے مسافروں میں محمد عمران، میاں توصیف، سلطان افضل اور عبدالرحمان شامل ہیں جو کہ ورک ویزے پر نیوزی لینڈ جا رہے تھے۔
امیگریشن حکام کے مطابق مسافروں کی جانب سے پیش کیے گئے ورک ویزے جعلی نکلے جبکہ ان کے پاسپورٹس پر راولپنڈی، ایبٹ آباد اور پشاور دفاتر کی پروٹیکٹر مہریں بھی مشکوک پائی گئیں۔
مسافروں کا تعلق اسلام آباد، راولپنڈی اور پشاور سے بتایا گیا ہے۔ مزید تفتیش اور ایجنٹ کی نشاندہی کے لیے تمام مسافروں کو اینٹی ہیومن ٹریفکنگ سرکل اسلام آباد منتقل کر دیا گیا ہے۔