پاکستان کرکٹ بورڈ کے چیئرمین محسن نقوی نے واضح کردیا ہے آئندہ جتنی بھی کرکٹ بھارت کے ساتھ کھیلی جائے گی وہ برابری کی بنیاد پر ہوگی۔
لاہور میں میڈیا سے گفتگو کرتے ہوئے وفاقی وزیر داخلہ نے کہا کہ بھارتی ٹیم اگر پاکستانی کھلاڑیوں سے ہاتھ نہیں ملانا چاہتی تو وہ ان کی مرضی ہے اس سے پاکستان کو کوئی غرض نہیں۔ ہاتھ نہ پھیلانے کا فیصلہ ان کا ہے، ہمیں کوئی مسئلہ نہیں، لیکن ہمارے کھلاڑی بھی ہاتھ ملانے کے لیے آگے نہیں بڑھتے۔
پی سی بی کے چیئرمین نے کہا کہ بھارت جب تک چاہے اپنی پالیسی جاری رکھیں لیکن پاکستان کا ہمیشہ ایک ہی موقف رہا ہے کہ سیاست اور کھیل کو الگ الگ رکھنا چاہیے۔ انہوں نے کہا کہ وزیراعظم شہباز شریف نے بھی ان پر واضح کر دیا ہے کہ پاکستان کبھی بھی کھیلوں میں سیاست کو نہیں لائے گا۔
انہوں نے کہا کہ بھارت کے ساتھ اب ہر چیز برابری کی بنیاد پر ہوتی ہے اسی وجہ سے پاکستان اپنے ورلڈ ٹی ٹوئنٹی کپ کے سارے میچز سری لنکا میں کھیلے گا۔ بھارت نے پاکستان آکر کھیلنے سے انکار کیا تھا جب ہم نے چیمپینز ٹرافی کا انعقاد کیا تو اس وقت میں نے بھی فیصلہ کرلیا تھا اور بھارتی کرکٹ بورڈ اور آئی سی سی کو بھی باور کروا دیا تھا کہ جب تک بھارت کی ٹیم پاکستان آکر نہیں کھیلے گی تو پاکستان کی ٹیم بھی بھارت میں کسی بھی مقابلے میں نہیں کھیلے گی۔ اسی وجہ سے اب پاکستان ورلڈ کپ کے میچز سری لنکا میں کھیلے گا اور اگر پاکستان سیمی فائنل اور فائنل تک رسائی حاصل کر لیتا ہے تو بھارت میزبان ہونے کے باوجود سری لنکا میں ہی فائنل کھیلے گا۔