وزیراعظم شہباز شریف نے 38 ارب روپے کے خصوصی رمضان ریلیف پیکج کا اعلان کر دیا، جس کے تحت مستحق خاندانوں کو فی کس 13 ہزار روپے فراہم کیے جائیں گے۔
رمضان ریلیف پیکج کے اجرا کی تقریب میں سیکرٹری بینظیر انکم سپورٹ پروگرام نے بریفنگ دیتے ہوئے بتایا کہ اس سال امدادی رقم بڑھا کر 13 ہزار روپے کر دی گئی ہے۔ ان کا کہنا تھا کہ پیکج کا بنیادی مقصد مستحق افراد کو باعزت اور شفاف طریقے سے مالی معاونت فراہم کرنا ہے۔
بریفنگ میں بتایا گیا کہ گزشتہ سال رمضان پیکج کے لیے 20 ارب روپے مختص کیے گئے تھے جبکہ اس سال اس رقم کو بڑھا کر 38 ارب روپے کر دیا گیا ہے۔ 2025 میں مستحقین کو 5 ہزار روپے دیے گئے تھے، تاہم اب رقم میں نمایاں اضافہ کیا گیا ہے۔
حکام کے مطابق امدادی رقم مستحق خاندانوں کو براہ راست بینکوں کے ذریعے منتقل کی جائے گی تاکہ شفافیت یقینی بنائی جا سکے۔ وزرا پر مشتمل کمیٹی پیکج کے تمام مراحل کی نگرانی کرے گی جبکہ وزیراعظم خود بھی نظام کی نگرانی کر رہے ہیں۔
تقریب سے خطاب کرتے ہوئے وزیراعظم شہباز شریف نے کہا کہ گزشتہ سال ڈیجیٹل نظام کے ذریعے مستحقین تک امدادی رقم پہنچائی گئی تھی اور اس سال مزید مؤثر اور شفاف نظام اپنایا جائے گا۔ انہوں نے کہا کہ چاروں صوبوں، گلگت بلتستان اور آزاد کشمیر میں مستحق خاندانوں کو فی خاندان 13 ہزار روپے فراہم کیے جائیں گے۔