وفاقی وزیر بحری امور جنید انوار چوہدری کی زیرِ صدارت پورٹ قاسم اتھارٹی بورڈ کا اجلاس ہوا جس میں پورٹ قاسم پر 150 ایکڑ رقبے پر آٹو زون قائم کرنے کا اعلان کیا گیا۔
وفاقی وزیر بحری امور جنید انوار چوہدری نے کہا کہ آٹو زون سے سالانہ تقریباً 500 ملین ڈالر کی برآمدات متوقع ہیں جبکہ منصوبے سے سالانہ تقریباً 200 ملین ڈالر زرمبادلہ حاصل ہوگا۔
انہوں نے بتایا کہ آٹو زون میں گاڑیوں کی ڈسپلے اور اسپیئر پارٹس کی سہولتیں فراہم کی جائیں گی جبکہ منصوبے سے آٹو موٹیو شعبے میں برآمدات کے نئے مواقع پیدا ہوں گے۔
جنید انوار چوہدری کے مطابق آٹو زون پاکستان میں گاڑیوں کی درآمد، ریفربشمنٹ اور برآمد کا مربوط فریم ورک متعارف کرائے گا۔
اجلاس میں معظم الیاس نے کہا کہ منصوبے کو مارکیٹ کی طلب کے مطابق وسعت دینا ممکن ہوگا جبکہ چیئرمین پورٹ قاسم اتھارٹی نے کہا کہ آٹو زون کا ماڈل ملک کے دیگر حصوں میں بھی اپنایا جا سکتا ہے۔