وفاقی وزارتوں میں استعمال ہونے والے ای آفس سسٹم کو ممکنہ سائبر حملوں سے محفوظ بنانے کے لیے اہم ایڈوائزری جاری کر دی گئی ہے۔
نیشنل سرٹ کی جانب سے جاری ہدایات میں کہا گیا ہے کہ ای آفس سسٹم کی مؤثر نگرانی کے لیے نیکسٹ جنریشن فائر وال نصب کیا جائے اور ہر وزارت میں ڈائریکٹر سائبر سیکیورٹی تعینات کیا جائے۔
ایڈوائزری میں یہ بھی تجویز دی گئی ہے کہ نیشنل انفارمیشن ٹیکنالوجی بورڈ (این آئی ٹی بی) میں خصوصی سائبر سیکیورٹی ٹیم قائم کی جائے تاکہ سرکاری ڈیجیٹل نظام کو مزید محفوظ بنایا جا سکے۔
رپورٹ کے مطابق ای آفس سسٹم سے متعلق سیکیورٹی ہدایات پر 30 دن کے اندر عملدرآمد یقینی بنانے کی ہدایت کی گئی ہے۔
ڈی جی نیشنل سرٹ کی جانب سے سیکیورٹی سفارشات 43 وفاقی وزارتوں اور اہم محکموں کو بھجوا دی گئی ہیں، جبکہ وزارتوں سے رابطوں کی ذمہ داری ڈائریکٹر نیشنل سرٹ خرم جاوید کو سونپ دی گئی ہے۔