کراچی کے علاقے گلبہار میں نجی بینک کی اے ٹی ایم مشین توڑ کر رقم نکالنے کی کوشش ناکام بنا دی گئی، پولیس نے موقع پر کارروائی کرتے ہوئے ملزم کو گرفتار کرلیا۔
پولیس کے مطابق ملزم نے اے ٹی ایم مشین کو شدید نقصان پہنچا کر کیش نکالنے کی کوشش کی، جس کے نتیجے میں مشین کی اسکرین، کیش ڈراؤرز اور دیگر حصے متاثر ہوئے۔ تفتیش میں یہ انکشاف ہوا ہے کہ ملزم نے مشین توڑنے کے لیے پتھر کا استعمال کیا۔
گلبہار پولیس نے بروقت کارروائی کرتے ہوئے ملزم حیدر علی ولد اقبال کو گرفتار کر کے بینک عملے کی مدعیت میں مقدمہ درج کرلیا ہے۔
پولیس ریکارڈ کے مطابق گرفتار ملزم سابقہ ریکارڈ یافتہ ہے اور پہلے بھی موٹر سائیکل لفٹنگ کی وارداتوں میں ملوث رہا ہے۔ ملزم کو مزید قانونی کارروائی اور تفتیش کے لیے متعلقہ شعبہ تفتیش کے حوالے کردیا گیا ہے۔