وفاقی تحقیقاتی ادارے (ایف آئی اے) نے خود کو اطالوی سفارتخانے کا نمائندہ ظاہر کرکے شہریوں سے فراڈ کرنے والے جعلساز گروہ کے خلاف کارروائی کرتے ہوئے سرغنہ سمیت 9 ملزمان کو گرفتار کرلیا۔
ایف آئی اے کے مطابق ملزمان نے ایک شہری کو اٹلی بھجوانے کا جھانسہ دے کر اس سے 45 لاکھ روپے ہتھیائے تھے۔ معاملے کی اطلاع ملنے پر اٹلی کے سفارتخانے کی جانب سے نیشنل سائبر کرائم انویسٹی گیشن ایجنسی (این سی سی آئی اے) میں درخواست دی گئی، جس پر کارروائی عمل میں لائی گئی۔
ایف آئی اے کا کہنا ہے کہ گرفتار ملزمان خود کو اطالوی سفارتخانے کا اہلکار ظاہر کرتے تھے اور بیرون ملک بھجوانے کے نام پر شہریوں کو اپنے جال میں پھنساتے تھے۔
حکام کے مطابق ملزمان کے خلاف مقدمہ درج کرلیا گیا ہے جبکہ گروہ کے دیگر ساتھیوں اور فراڈ کے طریقہ کار سے متعلق مزید تفتیش جاری ہے۔