وفاقی تحقیقاتی ادارے (ایف آئی اے) نے افغان باشندوں کے شناختی کارڈ بنانے میں ملوث نادرا افسر کو گرفتار کرلیا۔
ایف آئی اے نے کراچی کے علاقوں میٹروول، سائٹ ایریا اور اورنگی ٹاؤن میں کارروائی کرتے ہوئے غیر قانونی طور پر پاکستانی شناختی کارڈز اور دستاویزات حاصل کرنے والے دو افغان شہریوں حبیب اللہ اور نعمت اللہ کو گرفتار کرلیا ہے۔
حکام کے مطابق گرفتار ملزمان کی نشاندہی پر ایف آئی اے نے کارروائی کا دائرہ وسیع کیا، جس کے نتیجے میں نادرا کے اسسٹنٹ سپرنٹنڈنٹ فرقان احمد درانی کو بھی گرفتار کرلیا گیا۔
نادرا افسر پر الزام ہے کہ اس نے قواعد و ضوابط کی خلاف ورزی کرتے ہوئے غیر ملکیوں کو پاکستانی شناختی دستاویزات کی فراہمی میں سہولت کاری فراہم کی۔
ایف آئی اے نے ملزمان کے خلاف مقدمہ درج کر کے معاملے کی مزید تحقیقات کا آغاز کر دیا ہے تاکہ اس نیٹ ورک میں شامل دیگر افراد کو بھی قانون کے کٹہرے میں لایا جا سکے۔