ایکسائز نارکوٹکس کنٹرول ونگ ضلع وسطی نے نارتھ کراچی میں اقراء یونیورسٹی کے قریب ایک کارروائی کے دوران تعلیمی اداروں میں منشیات سپلائی کرنے والے بڑے نیٹ ورک کو بے نقاب کرتے ہوئے دو اہم کارندوں احسان اور زرغام کو گرفتار کرلیا ہے۔
حکام کے مطابق ملزمان کے قبضے سے بھاری مقدار میں ویڈ برآمد ہوئی ہے۔
ابتدائی تحقیقات میں انکشاف ہوا ہے کہ یہ گروہ بلوچستان سے کراچی منشیات اسمگل کرتا تھا اور شہر کے پوش علاقوں میں واقع یونیورسٹیز میں اسے سپلائی کیا جاتا تھا۔
ایکسائز نارکوٹکس ونگ کا کہنا ہے کہ اس گینگ میں خواتین بھی شامل ہیں، جبکہ گرفتار ملزمان نے دورانِ تفتیش کچھ اہم شخصیات کی جانب سے سہولت کاری فراہم کیے جانے کا اعتراف بھی کیا ہے جس پر مزید تحقیقات جاری ہیں۔
حکام نے ملزمان کے خلاف مقدمہ درج کر کے گروہ کے دیگر ارکان کی تلاش شروع کردی ہے۔