کراچی میں سندھ اسمبلی کے قریب ریڈ زون کے علاقے میں واقع موبائل مارکیٹ میں ڈکیتی کی واردات پر ایڈیشنل آئی جی کراچی آزاد خان نے نوٹس لیتے ہوئے ڈی آئی جی ساؤتھ سے رپورٹ طلب کرلی۔
واقعہ کے مطابق تین موٹر سائیکلوں پر سوار پانچ مسلح ملزمان زم زم کمیونیکیشن کا 40 لاکھ روپے سے زائد مالیت کے 55 موبائل فونز سے بھرے دو کارٹن اور ایک بیگ چھین کر فرار ہوگئے۔ واردات پر صدر کمیڈا منہاج گلفام نے مذمت کرتے ہوئے لوٹا گیا مال فوری برآمد کرنے کا مطالبہ کیا۔
ایڈیشنل آئی جی کراچی نے ملزمان کی فوری گرفتاری اور مسروقہ مال کی برآمدگی کے احکامات جاری کرتے ہوئے تفتیش کے لیے تمام دستیاب وسائل بروئے کار لانے کی ہدایت کی ہے۔
ایڈیشنل آئی جی نے کہا کہ شہریوں کے جان و مال کا تحفظ پولیس کی اولین ترجیح ہے اور جرائم میں ملوث عناصر کے خلاف بلا امتیاز سخت قانونی کارروائی ہوگی۔