ملزم شہریار بٹ پہلے سے شادی شدہ تھا اور مصباح اس کی تیسری بیوی تھی۔ ابتدائی تفتیش کے مطابق ملزم کی جانب سے تشدد معمول تھا اور وہ مقتولہ پر جہیز اور پیسوں کے حوالے سے دباؤ ڈالتا تھا۔ 6 جون کو بھی ملزم نے مصباح پر تشدد کیا، اس دوران اس نے اسکرو ڈرائیور اور دیگر سخت اشیاء کا استعمال کرتے ہوئے اس کے سر اور جسم پر وار کیے۔ بعد ازاں اس کے زخموں پر نمک اور چائے کی پتی لگائی گئی اور اسے گھر سے نکال دیا گیا۔ متاثرہ خاتون 9 جون کو زخموں کی شدت کے باعث دم توڑ گئی۔ ملزم شہریار بٹ نے دورانِ تفتیش اپنے جرم کا اعتراف بھی کرلیا ہے۔
کراچی کے علاقے سرجانی ٹاؤن میں پیش آنے والے اس افسوسناک قتل کیس کی تحقیقات جاری ہیں جس میں ایس ایس پی انویسٹی گیشن ویسٹ دانیہ رانا نے اہم تفصیلات سامنے رکھ دی ہیں۔
پولیس کے مطابق مقتولہ مصباح کا شوہر شہریار بٹ پہلے سے شادی شدہ تھا اور مصباح ان کی تیسری اہلیہ تھیں۔ تفتیشی حکام کے مطابق ملزم کی جانب سے تشدد کے واقعات پہلے سے جاری تھے اور وہ اکثر جہیز اور مالی مطالبات کو لے کر جھگڑا کرتا تھا۔
ایس ایس پی انویسٹی گیشن کے مطابق 6 جون کو ہونے والے واقعے میں ملزم نے انتہائی سنگین نوعیت کا تشدد کیا جس کے بعد متاثرہ خاتون کو گھر سے نکال دیا گیا۔ وہ شدید زخمی حالت میں کئی دن تک زندگی اور موت کی کشمکش میں رہیں اور 9 جون کو ان کی موت واقع ہوگئی۔
پولیس حکام نے مزید بتایا کہ ملزم شہریار بٹ نے دورانِ تفتیش جرم کا اعتراف کر لیا ہے جبکہ قانونی کارروائی کے تحت مقتولہ کے پوسٹ مارٹم کے لیے قبر کشائی کی اجازت بھی طلب کر لی گئی ہے تاکہ تحقیقات کو آگے بڑھایا جاسکے۔
یہ کیس گھریلو تشدد اور جہیز کے نام پر ہونے والے ظلم کی ایک اور سنگین مثال کے طور پر سامنے آیا ہے جس کی تفتیش جاری ہے۔