انسدادِ دہشت گردی عدالت اسلام آباد نے پی ٹی آئی رہنماؤں کے خلاف احتجاج کیس میں چالان مقررہ وقت پر جمع نہ کرانے پر سخت کارروائی کرتے ہوئے ڈی آئی جی جواد طارق کو ایک ماہ قید کی سزا سنا دی ہے۔
انسدادِ دہشت گردی عدالت کے جج طاہر عباس سپرا نے کیس کی سماعت کے دوران پولیس کی جانب سے غفلت اور عدالتی احکامات پر عمل نہ کرنے پر برہمی کا اظہار کیا اور یہ فیصلہ سنایا۔
عدالت نے قید کی سزا کے ساتھ ڈی آئی جی جواد طارق پر ایک لاکھ روپے جرمانہ بھی عائد کیا ہے۔ یہ مقدمہ پاکستان تحریک انصاف کی قیادت کے خلاف درج ایک احتجاجی کیس سے متعلق ہے، جس میں چالان بروقت عدالت میں جمع نہیں کروایا گیا تھا۔
عدالتی ریمارکس میں کہا گیا کہ قانون کے مطابق کارروائی اور عدالتی احکامات پر عمل درآمد ہر صورت یقینی بنایا جانا چاہیے۔ جج طاہر عباس سپرا نے واضح کیا کہ فیصلے کا تفصیلی تحریری حکم نامہ بعد میں جاری کیا جائے گا۔