کابینہ ڈویژن نے وفاقی دارالحکومت کے ریڈ زون میں قائم وزارتوں اور ڈویژنز کے لیے 23 جون کو ورک فرام ہوم کا باضابطہ نوٹیفکیشن جاری کردیا ہے۔
نوٹیفکیشن کے مطابق ریڈ زون میں واقع تمام وزارتوں اور ڈویژنز کے ملازمین آج گھر سے اپنے فرائض سرانجام دیں گے، تاہم اہم نوعیت کے سرکاری ادارے اور وزارتیں معمول کے مطابق کھلی رہیں گی اور دفتری امور جاری رکھیں گی۔
کابینہ ڈویژن کے اعلامیے کے مطابق وزیرِ اعظم آفس، کابینہ ڈویژن اور فنانس ڈویژن معمول کے مطابق کام کریں گے۔ اس کے علاوہ وزارتِ داخلہ، وزارتِ خارجہ، وزارتِ قانون، وزارتِ تجارت اور وزارتِ صنعت و پیداوار کے دفاتر بھی کھلے رہیں گے۔
نوٹیفکیشن میں مزید کہا گیا ہے کہ فیڈرل بورڈ آف ریونیو (ایف بی آر)، وزارتِ پارلیمانی امور، پلاننگ ڈویژن، سینیٹ سیکریٹریٹ اور قومی اسمبلی سیکریٹریٹ میں بھی دفتری سرگرمیاں معمول کے مطابق جاری رہیں گی۔
حکام کے مطابق یہ انتظامی فیصلہ خصوصی سیکیورٹی اور سرکاری مصروفیات کے پیش نظر کیا گیا ہے تاکہ ضروری حکومتی امور کی انجام دہی بلا تعطل جاری رہ سکے۔