بلوچستان کے ضلع پنجگور میں سیکیورٹی فورسز نے خفیہ اطلاعات کی بنیاد پر کامیاب کارروائی کرتے ہوئے دہشت گردی کی ایک بڑی سازش ناکام بنادی۔
سیکیورٹی ذرائع کے مطابق پنجگور کے علاقے جیرک میں کیے گئے آپریشن کے دوران ایک گاڑی سے بھاری مقدار میں اسلحہ، مواصلاتی سامان اور دھماکا خیز مواد برآمد کیا گیا۔ برآمد ہونے والے سامان میں 4 راکٹ فیوز اور متعدد دیسی ساختہ بم (آئی ای ڈیز) بھی شامل ہیں۔
ذرائع کا کہنا ہے کہ قبضے میں لیا گیا دھماکا خیز مواد کسی بڑے دہشت گرد حملے میں استعمال کیے جانے کا خدشہ تھا، تاہم سیکیورٹی فورسز کی بروقت اور پیشہ ورانہ کارروائی نے دہشت گردوں کے مذموم عزائم ناکام بنا دیے۔
سیکیورٹی حکام کے مطابق آپریشن کے نتیجے میں علاقے کو ممکنہ بڑے جانی و مالی نقصان سے محفوظ بنا لیا گیا ہے، جبکہ دہشت گردی کے نیٹ ورک سے متعلق مزید تحقیقات جاری ہیں۔
ذرائع نے اس کامیاب کارروائی کو بلوچستان میں امن و استحکام کے قیام کے لیے سیکیورٹی فورسز کے عزم کا مظہر قرار دیتے ہوئے کہا کہ فورسز صوبے میں امن دشمن عناصر کے خلاف مؤثر کارروائیاں جاری رکھے ہوئے ہیں۔