بحرالکاہل کے خطرناک پانیوں میں آٹھ روز تک خراب کشتی میں بھٹکنے والے جزائر کک کے ماہی گیر جونیئر اپیوٹا معجزانہ طور پر زندہ بچ گئے۔
رپورٹ کے مطابق ماہی گیر 11 جون کو مچھلی کے شکار کے لیے سمندر میں نکلے تھے تاہم ان کی کشتی کا انجن خراب ہونے کے بعد وہ تیز ہواؤں اور بلند لہروں کے رحم و کرم پر آ گئے۔ محدود سامان کے ساتھ انہوں نے زندہ رہنے کے لیے کچی مچھلی کھائی اور بارش کا پانی جمع کر کے پیا۔
آٹھویں روز نیوزی لینڈ کی فضائیہ کے ایک طیارے نے ان کی کشتی کو دیکھ لیا جس کے بعد قریب موجود تائیوانی ماہی گیر جہاز نے انہیں بحفاظت ریسکیو کر لیا۔ انہیں ابتدائی طبی امداد کے بعد نیوزی لینڈ منتقل کر دیا گیا ہے جہاں سے وہ جلد اپنے گھر واپس جائیں گے۔