امریکی ریاست ٹیکساس میں شہد کی مکھیوں کو لے جانے والا ٹرک الٹنے سے تقریباً 20 لاکھ شہد کی مکھیاں فرار ہو گئیں جس کے بعد علاقے میں ہنگامی صورتحال پیدا ہوگئی۔
مقامی حکام کے مطابق اورنج کاؤنٹی میں 18 پہیوں والا ٹرک موڑ کاٹتے ہوئے الٹ گیا۔ ٹرک میں تقریباً 50 ہزار پاؤنڈ وزنی شہد کی مکھیوں کے چھتے موجود تھے۔ حادثے میں ڈرائیور محفوظ رہا، تاہم لاکھوں مکھیاں اردگرد کے علاقے میں پھیل گئیں۔
واقعے کے بعد شہد کی مکھیاں پالنے والے ماہرین کو فوری طور پر طلب کیا گیا جنہوں نے مکھیوں کو دوبارہ چھتوں میں منتقل کرنے کا کام شروع کر دیا۔
حکام نے شہریوں کو احتیاطی تدابیر اختیار کرتے ہوئے متاثرہ علاقے سے دور رہنے اور غیر ضروری طور پر گھروں سے باہر نہ نکلنے کی ہدایت کی ہے۔