ومبلڈن ٹینس چیمپئن شپ کے مینز سنگلز کے دونوں سیمی فائنل آج کھیلے جائیں گے تاہم ٹینس شائقین کی تمام تر توجہ سربیا کے اسٹار نوواک جوکووچ اور دفاعی چیمپئن اٹلی کے یانک سنر کے درمیان ہونے والے بڑے مقابلے پر مرکوز ہے۔
24 بار کے گرینڈ سلم چیمپئن نوواک جوکووچ اپنے کیریئر کا 25واں گرینڈ سلم ٹائٹل جیتنے کے مشن پر گامزن ہیں تاہم انہیں سیمی فائنل میں موجودہ چیمپئن یانک سنر کے سخت چیلنج کا سامنا ہوگا۔ دونوں کھلاڑی اب تک مجموعی طور پر 11 مرتبہ آمنے سامنے آ چکے ہیں جن میں سنر نے 6 جبکہ جوکووچ نے 5 کامیابیاں حاصل کی ہیں۔ البتہ ومبلڈن کی گھاس پر ہونے والے تین مقابلوں میں جوکووچ دو جبکہ سنر ایک میچ جیت چکے ہیں۔
گزشتہ سال ومبلڈن کے سیمی فائنل میں بھی یانک سنر نے جوکووچ کو شکست دے کر فائنل تک رسائی حاصل کی تھی جس کے باعث اس بار سربین اسٹار کے پاس شکست کا حساب برابر کرنے کا بہترین موقع ہوگا۔
دوسرے سیمی فائنل میں میزبان برطانیہ کے وائلڈ کارڈ انٹری حاصل کرنے والے آرتھر فیری کا مقابلہ جرمنی کے تجربہ کار کھلاڑی الیگزینڈر زیوریف سے ہوگا۔ دونوں ٹینس اسٹارز اپنے کیریئر میں پہلی بار ایک دوسرے کے مدمقابل آئیں گے جس کے باعث یہ مقابلہ بھی شائقین کے لیے خاص دلچسپی کا باعث ہوگا۔