وفاقی حکومت نے پیٹرول کی قیمت میں اضافے کے ساتھ ساتھ پیٹرولیم لیوی کی شرح میں بھی نمایاں اضافہ کر دیا ہے، جس کے بعد پیٹرول پر عائد لیوی 80 روپے فی لیٹر تک پہنچ گئی۔
سرکاری اعلامیے کے مطابق پیٹرول پر پٹرولیم لیوی میں 9 روپے 64 پیسے فی لیٹر اضافہ کیا گیا جبکہ ہائی اسپیڈ ڈیزل پر لیوی کی شرح میں کوئی تبدیلی نہیں کی گئی اور اسے 70 روپے 82 پیسے فی لیٹر پر برقرار رکھا گیا ہے۔
ماہرین کے مطابق پیٹرولیم لیوی میں اضافے سے حکومت کی آمدنی میں اضافہ ہوگا تاہم اس اقدام کے باعث صارفین پر مالی دباؤ بھی بڑھنے کا خدشہ ہے کیونکہ لیوی پیٹرولیم مصنوعات کی مجموعی قیمت کا اہم حصہ ہوتی ہے۔
یاد رہے کہ حکومت نے پٹرولیم مصنوعات کی نئی قیمتوں کا بھی اعلان کیا ہے جس کے تحت پیٹرول 13 روپے 18 پیسے فی لیٹر مہنگا ہونے کے بعد 310 روپے 71 پیسے فی لیٹر کا ہو گیا ہے جبکہ ہائی اسپیڈ ڈیزل کی قیمت میں 13 روپے 80 پیسے فی لیٹر اضافے کے بعد نئی قیمت 323 روپے 30 پیسے فی لیٹر مقرر کر دی گئی ہے۔نئی قیمتوں اور لیوی کی شرح کا اطلاق فوری طور پر کر دیا گیا ہے۔