کلفٹن کے علاقے بوٹ بیسن پر نجی بینک کے باہر ڈکیتی کے دوران ڈاکوؤں کی اندھا دھند فائرنگ سے ایک نوجوان جاں بحق ہوگیا، جبکہ ملزمان 25 لاکھ روپے لوٹ کر فرار ہونے میں کامیاب ہوگئے۔
پولیس حکام کے مطابق، آکاش نامی نوجوان اپنے والد اور ایک ساتھی کے ہمراہ تین تلوار کے قریب واقع نجی بینک سے 50 لاکھ روپے کی رقم نکلوا کر بوٹ بیسن پر موجود دوسرے بینک میں جمع کرانے پہنچا تھا، جہاں گھات لگائے مسلح ملزمان نے ان کی کار پر دھاوا بول دیا۔
اس دوران بینک کے سیکیورٹی گارڈ نے جرات کا مظاہرہ کرتے ہوئے ملزمان پر فائرنگ کی، جس کے جواب میں ڈاکوؤں نے بھی اندھا دھند گولیاں چلائیں۔
ملزمان کی گولیوں کا نشانہ بن کر نوجوان آکاش موقع پر ہی دم توڑ گیا، جبکہ حملہ آور 25 لاکھ روپے سے بھرا تھیلا چھین کر فرار ہوگئے۔ پولیس نے واقعے کی تحقیقات اور ملزمان کی تلاش شروع کردی ہے۔