اسپورٹس بورڈ پنجاب کے زیر اہتمام قائم سی ایم پنجاب اسپورٹس اکیڈیمز میں نوجوان کھلاڑیوں کی تربیت کا سلسلہ تیزی سے جاری ہے۔ اس سلسلے میں سی ایم پنجاب آرچری اکیڈیمی میں 35 سے زائد گرلز اور بوائز کھلاڑیوں کو کوچ محمد تیمور شاہ نے درست نشانہ لگانے کی خصوصی تربیت دی، جس کے بعد کھلاڑیوں کی حوصلہ افزائی کے لیے ان کے درمیان آرچری کے نمائشی مقابلے بھی کروائے گئے۔
ڈائریکٹر جنرل اسپورٹس پنجاب محمد طارق قریشی کے مطابق، سی ایم پنجاب اسپورٹس اکیڈیمز میں اس وقت 2500 سے زائد کھلاڑیوں کو تربیت دی جا رہی ہے اور کھلاڑیوں کے زبردست ریسپانس کو دیکھتے ہوئے ان اکیڈیمز کی تعداد کو 19 سے بڑھا کر 25 کیا جا رہا ہے۔ انہوں نے بتایا کہ ان اکیڈیمز میں 6 سے 19 سال تک کی عمر کے لڑکوں اور لڑکیوں کو مختلف کھیلوں کی جدید خطوط پر تربیت فراہم کی جا رہی ہے۔
ڈی جی اسپورٹس پنجاب نے مزید واضح کیا کہ سی ایم پنجاب اسپورٹس اکیڈیمز میں سارا سال بچوں کو مفت تربیت فراہم کی جائے گی۔ انہوں نے اس عزم کا اظہار کیا کہ ان اکیڈیمز کی بدولت ملک کو نیشنل اور انٹرنیشنل سطح کے بہترین کھلاڑی میسر آئیں گے جو عالمی میدانوں میں پاکستان کا پرچم بلند کریں گے۔