خیبرپختونخوا کے ضلع لکی مروت میں نامعلوم مسلح افراد کی فائرنگ سے جماعت اسلامی کے مقامی رہنما حاجی نقیب اللہ جاں بحق ہوگئے۔
پولیس کے مطابق واقعہ کرم پل کے قریب پیش آیا، جہاں نامعلوم حملہ آوروں نے فائرنگ کرکے حاجی نقیب اللہ کو نشانہ بنایا۔ حملے کے نتیجے میں وہ موقع پر ہی دم توڑ گئے۔
پولیس کا کہنا ہے کہ جاں بحق ہونے والے حاجی نقیب اللہ جماعت اسلامی ڈڈیوالہ کے امیر تھے۔ ان کی لاش ضروری قانونی کارروائی اور پوسٹ مارٹم کے لیے سرائے نورنگ اسپتال منتقل کردی گئی ہے۔
واقعے کی اطلاع ملتے ہی جماعت اسلامی کے کارکنوں اور مقامی افراد کی بڑی تعداد اسپتال پہنچ گئی، جبکہ پولیس نے جائے وقوعہ سے شواہد اکٹھے کرکے حملہ آوروں کی تلاش شروع کردی ہے۔